Etxeko gastuak: profesional autonomoentzako kenkari berriak

Kongresuan aho batez onartutako Lege berri horrek profesional autonomoen eskaera historiko bati erantzuten dio: beren eginkizun profesionala etxean gauzatzen duten norbere konturako langileek urari, gasari, elektrizitateari, telefoniari eta Interneti dagozkien hornidura-gastuen % 30 desgrabatu ahal izatea, hori bai, jarduera horretara bideratutako etxebizitzaren ehunekoari aplikatuta. Orain azalduko dizugu.

Zein baldintza bete behar dira kenkari horiek aplikatu ahal izateko?

Kenkari horiez baliatzeko, Ogasunak zure egoeraren alderdi guztiak ezagutu behar ditu. Beraz, etxetik lan egin behar baduzu, hala aitortu behar duzu jarduera abiarazten duzun momentuan, 036 eredua betetzean (edo 037 sinplifikatua). Bertan, zure negozioa garatuko duzun etxebizitzaren zein zatiri eragiten dion zehaztu beharko duzu. Lan egiteko etxebizitzaren zenbat metro karratu erabiliko dituzun deskribatu behar duzu, hau da, zure jarduera gauzatzeko erabiliko duzun kontsultak, bulegoak edo estudioak zenbat neurtzen duen.

Adibide praktiko bat irakurri nahi duzu?

Demagun zure etxebizitzak 100 metro karratu neurtzen dituela eta zure lantokia instalatzeko 15 erabiliko dituzula. Hornidura-faktura guztietatik % 30 bakarrik kendu ahal izango duzu, hau da, gastu horiek eta eragindako metro karratuak biderkatzean ateratzen den zenbatekoaren % 30.

Demagun urari, argiari, Interneti, telefonoari eta gasari dagozkien fakturen artean, guztira 500 euroko gastua duzula. Kantitate hori lantokira bideratutako etxebizitza-eremuaren kasuan kasuko ehunekoarekin biderkatuko dugu. Kasu honetan, pentsa dezagun 15 metro karratu hartuko dituzula; 100 metroko pisu batean, % 15a izango litzateke. Beraz, 500 x % 15 = 75. Zifra horri aplikatu ahal izango diozu % 30eko kenkaria. Horrenbestez: 75 x % 30 = 22,5 euro. Hori da kendu ahal izango duzun azken kantitatea.

Aldaketa garrantzitsua Ogasunaren ohiko irizpidean

2015. urte amaierara arte, Ogasunaren zerga-irizpideak ez zituen kengarri gisa hartzen hornidura-gastuak, horietako bakoitza justifikatzeko kontagailu independenteak edo erabilera profesionalera bideratutako telefono- eta Internet-linea bat izan ezean. Dena den, Administrazio Zentraleko Auzitegi Ekonomikoren (TEAC) urte horretako iraileko ebazpen batek politika horren kontrako epaia eman zuen, loteslea gainera.

Epai horren arabera, horniduren kasuan ez da aplikatu behar etxebizitzaren titulartasunetik eratorritako gastuetarako hainbanaketa bera, oso zaila baita lanari zein ehuneko dagokion zehaztea. Etxebizitzaren % 10 lanerako erabiltzen badugu, hipotekaren % 10 ken daiteke, baina... Telefono-gastuaren zer zenbateko dagokie lan arloko deiei?

Administrazio Zentraleko Auzitegi Ekonomikoak irizpide konbinatu bat proposatu zuen orduan, kontuan hartuta gure lan-jarduerak etxebizitzako zenbat metro karratu hartzen dituen, hori zenbat egunetan garatzen den eta horretara zenbat lan-ordu bideratzen diren. Hein batean, beren kontura lan egiten duten pertsonen eskaerei erantzuten zien irtenbide horrek, baina, egiaz, oso zaila zen praktikan jartzea. Lege berriarekin, atzean geratu da hori guztia.

Zein gastu ken ditzakezu etxetik lan egiten baduzu?

• Alokairua edo hipoteka, Ondasun Higiezinen gaineko Zerga (OHZ), zaborren tasa, jabekideen erkidegoa eta abar. Titulartasunarekin lotutako gastuekin ez da inoiz izan arazorik: gure lanerako erabiltzen dugun etxebizitza-ehunekoaren arabera kentzen dira. Datu hori gure lizentzia fiskalean agertzen da.
• Ustiapenarekin lotutako kontsumoak. Hemen sartzen dira bulegoko material-gastuak eta antzekoak, hau da, jarduera garatzeko beharrezko erremintak, fakturazioa egiteko programa informatikoak, adibidez.
• Norbere, ezkontidearen eta 25 urtetik beherako seme-alaben osasun- eta medikuntza-aseguruak; 500 euro kendu ahal izango dira, gehienez ere, pertsona bakoitzeko. Era berean, profesional autonomoaren bizi-asegurua ken daiteke.
• Joan-etorriak. Ibilgailu pribatu bat erabiltzen badugu, haren erabilera kenkarietatik kanpo geratzen da. Lan-arrazoien eraginez, leku batetik bestera mugitzeko edozein garraiobide erabiltzen badugu, garraiobide horren txartelaren kostua ken dezakegu. Ostatu-gastuak ere hemen sartzen dira. Era berean, zure jarduera profesionala garatzeko nahitaez egin behar dituzun mantenu-gastuetatik zenbat ken dezakezun ere zehazten du lege berriak: egunean 26,67 euro Espainiako Estatuan bazaude, eta 48,08 atzerrian bazaude.
• Kontabilitateko, lege-aholkularitzako, diseinu grafikoko, web sorkuntzako eta abarretako profesional independenteen zerbitzuak.
• Hornidurak. Arestian genion moduan, zure jarduerara bideratutako etxebizitza-ehunekoaren gaineko gastuen % 30 kendu ahal izango duzu.

Orain badakizu, saia zaitez zure kontabilitate-liburuetan kontu guztiak eguneratuta izaten eta faktura guztiak gordetzen, arazorik ez izateko. Eta ez ahaztu zugandik hurbil gaituzula eta, LABORAL Kutxan, zure zalantza profesionalei erantzuteko gestore espezializatuak ditugula.