LKHaurrak: Euskaraz disfrutatzeko haurrentzako edukien azaroko gomendioak

Ume, haur, gazte eta ez hain gazteok! Euskaraz disfrutatzeko edukiak nahi dituzue?

Azaroan, etxerako eta kalerako proposamenak ditugu zuontzat. Etxean geratu nahi baduzue, artaldeari segitzea baino, artaldeak berari segitzea maite duen ardi bat aurkeztuko dizuegu eta denboran bidaiatuz, Euskal Herriko historia ezagutzen duten bi haur. Kalerako gogoa baduzue, berriz, aukera zabala dugu. Getxon, haurrei bezain beste haien gurasoei gustatuko zaien kontzertu rockeroa duzue, eta Donostian, Espainiako Haur eta Gazte Narratiba Saria irabazi berri duen lanean oinarritutako dantza ikuskizuna. Iruñean, Baluartera hurbiltzen bazarete, piratekin itsaso zabalean nabigatu ahal izango duzue, eta hiritik apur bat urruntzeko salto bat ematen baduzue, parke oso dibertigarri bat ezagutuko duzue.

📽️ Telesaila

Shaun arditxoa

Slow motion teknikarekin animatutako telesail zoragarri honetan, Shaun izeneko arditxo batek bere artaldearen ardura nola hartzen duen kontatzen zaigu, ezertaz enteratzen ez den etxeko nagusiaren txakurraren borondatearen kontra, gehienetan, eta, tarteka, bere laguntzarekin.

🎞️ Pelikula

Lur eta Amets

Izen bereko liburuan oinarritutako pelikula honek Lur eta Amets bikiekin gertatzen dena kontatzen digu, gurasoek amonarekin uzten dituztenean eta amonak, bere botere magikoekin, denboran zehar bidaiatzera eta Euskal Herriaren iragana ezagutzera eramaten dituenean.

🎵 Musika

Txiki Rock, euskal rockari errepasoa

Abenduaren 7an, Getxoko Arrigunaga aretoan, 2 urtetik gorako haurrek eta haien familiek aukera izango dute euskal rocka inoiz ez bezala bizitzeko, umorez, alaitasunez eta erritmo biziz, Vitamin ekoiztetxeak egindako ikuskizun honi esker.

🩰 Dantza

Klera

Azaroaren 22an, Donostiako Larratxo kultur gunean egongo da Klera, Kukai Dantza taldeak Jon Maya dantzariaren ideia batetik abiatuta egin duen lana, Maite Larburuaren musikarekin eta  Espainiako Haur eta Literatura Sari Nazionala irabazi berri duen Leire Bilbaoren testuekin.

• Entzun Laboral Irratian Leire Bilbao idazlearekin elkarrizketa

🎭 Antzerkia

Itsasmaite

Abenduaren 13an Producciones Maestras Teatro konpainiaren Itsasmaite ikuskizuna estreinatuko da Iruñean, aurtengo Baluarte Txiki zikloaren baitan, eta 4 urtetik gora haurrek aukera izango dute Pepa “The Bottle” piratarekin 5 kontinenteetan zehar bidaiatzeko.

🎉 Urtebetetzea

Saltoka Jump

Iruñeako aldirietan, hirigunetik kilometro gutxira, 50 ohe elastiko, bola-igerilekuak eta akrobaziak egiteko beste hainbat aukera eskaintzen ditu parke honek, dibertitzeko eta nahi duenak, baita urtebetetzeak ospatzeko ere, jauzika, saltoka eta lagunekin, jakina!