Bizum eta fiskalitatea: zer aldatuko da 2026an (eta zer ez)

Partikularren arteko Bizum bidezko ordainketak ez dira aitortzen

Zerga Agentzia ez da Bizum bidez egindako partikularren arteko ordainketei buruzko informaziorik biltzen ari, eta ez du 2026an ere egingo. Hau da, lagunen edo senideen artean dirua bidaltzeak edo jasotzeak —adibidez, gastuak partekatzeko— ez dakar betebehar fiskal berririk, zenbatekoa edozein dela ere.

Ordainbideak ez du fiskalitatea zehazten

Ordainketa edo kobrantza baten tratamendu fiskala ez dago erabilitako bitartekoaren mende, bai Bizum, txartela, eskudirua, edo banku-transferentzia izan. Garrantzitsuena diru-sarreraren izaera da.Oro har, jarduera ekonomiko, komertzial, enpresarial edo profesional batetik datozen kobrantzak soilik ordaintzen dituzte zergak. Hori horrela zen lehen ere, eta hala izaten jarraituko du etorkizunean ere.

Zer aldatuko da 2026ko otsailetik aurrera?

Berritasun nagusiak enpresei, saltokiei, autonomoei eta profesionalei bakarrik eragiten die.2026ko otsailetik aurrera, finantza-erakundeek hilero eman beharko diote Zerga Agentziari kolektibo horiek jasotako kobrantza guztien berri, zenbatekoa eta erabilitako ordaintzeko modua alde batera utzita, Bizum barne.

Aldaketa horrek informazio- eta kontrol-helburua du, baina ez ditu zerga berriak sartzen, ezta dauden zerga-betebeharrak aldatzen ere.

Partikularrak betebehar horietatik kanpo geratzen dira

Informatzeko betebehar berri horrek ez die eragiten Bizum bidez egindako partikularren arteko ordainketei.Ez dago ordainketa horiek aitortzera behartzen duen zenbateko-mugarik, ezta erabiltzaile partikularrek zerbitzua erabiltzeko moduan inolako aldaketarik ere.

Laburbilduz

• Bizumek ez ditu arau fiskalak aldatu.
• Partikularren arteko ordainketak ez dira deklaratzen.
• Beren izaeragatik dagoeneko zergak ordaindu behar dituzten diru-sarrerak baino ez dira aitortu behar.
• 2026ko berritasunak finantza-erakundeek jarduera ekonomikoen kobrantzei buruz ematen duten informazioari baino ez dio eragiten.

LABORAL Kutxan beti gomendatzen dugu informazioa iturri ofizialekin egiaztatzea eta kanal fidagarrien bidez informatuta egotea, gaizki-ulertuak saihesteko.