Eguneratu zure ordenagailu, tableta eta mugikor zaharra zure Online Bankan segurtasunez jarduteko

Interneten, segurtasuna helburu ukaezin bat da mundu digitalean lan egiten dugun guztiontzat, hau da, Google Chrome eta Apple Safari gisako nabigatzaileetan lan egiten dugunontzat nahiz enpresentzat eta, jakina, LABORAL Kutxa moduko finantza-erakundeentzat.

Batzuetan, segurtasun hori bilatzeko hobekuntzak egin behar izaten dira, denbora igaro ahala zaharkituta geratu diren teknologiak eguneratuz.

Une horietako batean gaude: martxotik aurrera, LABORAL Kutxaren Online Bankan orain arte bezala jardun ahal izateko eguneratuta izan beharko duzu zure ordenagailu, tableta edo telefono adimendun zaharraren sistema eragilea, hura segurtasun-protokolo berri moderno eta seguruagoetara egokitzeko.

Zer dira segurtasun-protokolo berriak

Protokolo horiek bermatzen dituzte, besteak beste, Online Bankaren bitartez egiten dituzun eragiketen pribatutasuna eta segurtasuna, baita eCommerce batean egiten dituzun erosketena ere, eta nabigatzailean, web-orriaren helbidearen ondoan, agertzen den giltzarrapoak irudikatzen ditu.

Orain arte, Windows XP gisako sistema eragile zaharreko ordenagailuetan eta Android 4.4 aurreko mugikorretan instalatuta zeuden protokolo zaharrenak, TLS 1.0 eta TLS 1.1 deituak, modernoenekin batera bizi zitezkeen. Dena den, Chrome, Apple Safari, Microsoft Edge eta Mozilla Firefox nabigatzaile nagusiek bertsio zahar horiei euskarria ematen ez jarraitzea erabaki zuten 2018an.

Horrek esan nahi du, zure gailu zaharren sistema eragileak eguneratzen ez badituzu, ezin izango duzula segurtasun-protokolo modernoagoak dituzten gune seguruetan sartu, Online Bankan, adibidez. Era berean, ezin izango duzu nabigatu horiek eguneratu dituzten webguneetan, gehienetan, alegia.

Nola egokitu segurtasun-protokolo berriak

TLS 1.2 eta 1.3 segurtasun-protokolo berriak eduki ahal izateko, zure sistema eragilearen eguneratze automatikoak aktibatuta mantendu behar dituzu. Zure ordenagailua, tableta edo telefono adimenduna oso zaharrak badira eta sistema eragileak protokolo horiekin bateragarriak diren bertsioetara eguneratzeko aukerarik ematen ez badute, beharbada horiek berritu beharko dituzu segurtasunez nabigatzen jarraitzeko.

Segurtasun-ziurtagiria duen webgune bat baduzu, TLS protokoloaren bertsio seguru bat dela egiaztatu behar duzu. Incibek (Zibersegurtasuneko Institutu Nazionalak) azaldu duenez, zure enpresaren web-zerbitzarian TLSren zein bertsio gaituta dauden egiazta dezakezu GlobalSignek eskaintzen duen SSL Server Test izeneko erabilgarritasunaren bidez. Enpresaren domeinua “hostname” izeneko koadroan sartu eta “submit” aukeratu behar duzu azterketa hori egiteko.

Kontuan izan behar duzu zure enpresaren web-zerbitzariak TLS 1.0 edo 1.1 erabiltzen jarraitzen badu, zure erabiltzaileen, enpresaren edo hark eskaintzen duen irudiaren pribatutasuna eta segurtasuna arriskuan jarriko dituzten egoerak sortuko direla, hainbat arrazoi direla eta:

• Nabigatzaileek “ez seguru” gisa markatuko dute webgunea.
• Arriskuan jar daitezke erabiltzaileen pribatutasuna eta segurtasuna, eta beraz, ziberdelitugileentzat errazagoa izango da datuak lapurtzea.

Webgunea zerbitzari propio batean baduzu, eguneratzea egiteko langile adituekin harremanetan jartzea da onena, arazorik ez izateko. Baina zure webgunea hosting-zerbitzuak hornitzen dituen kanpoko enpresa batean badago, hark egin behar du.

Gogoratu, Interneten nabigatzen duzunean salbu egoteko modurik onena zure gailuak eguneratuta izatea dela, eta martxotik aurrera, LABORAL Kutxaren Online Bankarekin orain bezala jardun ahal izateko, zure gailu elektronikoen sistema eragilea eguneratuta izan beharko duzula.