Etxe-aseguruari buruz jakin behar duzun guztia alokairuko etxebizitzen kasuan

Etxe-asegurua hainbat zalantza eragiten dituen aseguru-mota bat da, alokairuko etxebizitzen kasuan batez ere: Beharrezkoa al da? Beharrezkoa bada, nork ordaindu behar du, errentatzaileak ala maizterrak? Biek estaldura berak kontratatu behar al dituzte?

Hori guztia argitzen laguntzea erabaki dugu, kasu bakoitzean zer egin behar duzun jakin dezazun, maizterra zein jabea zarela ere. Argibide hauekin laguntzea espero dugu.

Alokairuko etxebizitzen etxe-aseguruei buruzko ohiko galderak

Alokairuko etxebizitzen etxe-aseguruen inguruan sortzen diren galderei erantzuteko, lehenik eta behin oinarrizko kontzeptu batzuk zehaztuko ditugu.

Edukitzailea

Eraikinaren eraikuntza-elementuen eta egitura-elementuen multzoa hartzen da edukitzailetzat (zorua, sabaia, leihoak, ateak eta abar).

Edukia

Etxebizitzaren barruan dagoen guztia hartzen da edukitzat (altzariak, etxetresna elektrikoak eta abar).

Erantzukizun zibila

Hirugarrenei eragindako kalteak estaltzen dituen estaldura da, maizterra zein jabea zarela ere.

Etxe-aseguru batean edukitzailea, edukia eta erantzukizun zibila zer diren jakin ondoren, errazago ulertuko dugu nork kontratatu behar duen etxe-asegurua alokairuko etxebizitza baten kasuan, eta benetan beharrezkoa den ala ez.

Nork ordaindu behar du asegurua?

Etxe-aseguruaren kontratazioa etxearen jabearen erantzukizuna da. Izan ere, etxea egoera egokian egoteko interesik handiena duena da.

Nolanahi ere, hainbat modalitate daude etxe-aseguruen barruan, eta denak ez dira interesekoak etxeko jabearentzat. Hortxe sortzen dira zalantzarik ohikoenak.

Zer kasutan da interesgarria jabearentzat, eta zer kasutan maizterrarentzat?

Etxebizitzaren jabeak edukitzailea aseguratu behar du, batez ere erantzukizun zibilari dagokionez, ‘nahitaezko’ garrantzia duen bermea baita hirugarrenei kalteak eragiten zaizkien kasuetarako (maizterrak eragiten dituenak zein bestelakoak).

Adibidez, hodiak hausten diren edo hezeguneak agertzen diren kasuetarako. Hala ere, etxebizitza hipotekatuta dagoenean izan ezik, ez da erabat beharrezkoa edo nahitaezkoa.

Edukiari dagokionez, aseguratzea interesgarria izan daiteke maizterrarentzat zein jabearentzat, baina hori ere ez da nahitaezkoa. (Laburbilduz: bakoitzak bere jabetzakoa dena aseguratu beharko du)

Maizterraren kasuan, oso komenigarria da edukia aseguratzea, baita erantzukizun zibila ere, hirugarrenei kalteak eragiten dizkien kasurako. Kontuan hartu behar da etxebizitzaren jabearen polizak ez dituela estaltzen maizterrak hirugarrenei eragindako kalteak edo ezbeharrak eta, jabearen aseguru-entitateak kalte-ordainketaren bat egiten badu, ondoren maizterrari erreklamatuko diola.

Orduan, etxe-aseguru bat egin behar al dut alokairu-erregimenean bizi banaiz?

Honaino iritsita, esan dezakegu alokairuan bizi bazara, etxe-aseguru bat kontratatzea nahitaezkoa ez bada ere, asegururik gomendagarrienetako bat dela kasu horietan.

Gainera, etxe-aseguruari probetxua atera dakioke, maizterra zein etxebizitzaren jabea babesten baititu kasu askotan.

Bi aldeek (maizterrak eta jabeak) etxe-aseguru bat badute, babestuta egongo dira eta elkarren arteko gatazka posible ugari saihestuko dituzte.

Adibidez, maizterrak alokairua uzten duenean, etxe-aseguru baten “eskutrebe-zerbitzura” jo dezake erabileraren ondorioz eragin diren eta etxebizitzaren fidantzaren galera ekar dezaketen kalte txikiak konpontzeko. Edo, bestela, jabeak konpon ditzake aurreko maizterrak eragindako xehetasun estetiko horiek, hurrengo errentamenduari begira.

Alokairuaren arriskua

Adierazitako guztiaz gain, asegurua kontratatzeko azken arrazoi bat aipatu beharra dago: alokairuaren arriskua aseguratzea, poliza gisa edota estaldura gisa.

Alokairuaren arriskua aseguratzen denean, ordaindu gabeko alokairuak estaltzen dituztenak hartzen dira estalduratzat.

Maizterra zein jabea zarela ere etxe-aseguru bat kontratatzeak duen garrantzia helarazi izana espero dugu. Informazio gehiago behar baduzu, ez izan zalantzarik eta jarri gurekin harremanetan. Pozik lagunduko dizugu.