Euskal enpresek baikortasuna sendotu dute 2025eko bigarren hiruhilekoan

Enpresa Konfiantza Indizea 58 puntura iritsi da, hau da, 4 puntu baino gehiago igo da aurreko hiruhilekoarekin alderatuta (53,6), eta, horrela, berretsi egin da euskal enpresen konfiantzaren joera positiboa 2025eko bigarren hiruhilekoari begira. Zifra horrek jarduera ekonomikoaren hedapena adierazten jarraitzen du, 50eko atalasetik gora kokatu baita.

Aurreko txostenetan bezala, eremu geografiko desberdinetako espektatibak ere kontuan hartu dira. Kasu honetan, EAEko indizea Euroguneko datuaren oso gainetik dago, eta Estatukoa gainditzen du, 50,2 eta 54 punturekin, hurrenez hurren (biak urtarrilean). Emaitza horrek berretsi egiten du euskal enpresa-ehunaren sendotasuna, oso ingurune ekonomiko aldakorraren aurrean.

Beti bezala, zenbaki horiek LABORAL Kutxaren Ikerketa Sailak Euskal Autonomia Erkidegoko 400 enpresa baino gehiagori, 2025eko bigarren hiruhilekoari begira dituzten aurreikuspen ekonomikoak ezagutzeko xedez egindako inkesta baten ondorio dira.

Ingurune ekonomikoa eta enpresa-espektatibak

Inkestak erakusten du ingurune ekonomikoari buruzko pertzepzio apur bat negatiboagoa dagoela aurreko hiruhilekoarekin alderatuta. Lehen datu horrek erakusten du urteko bigarren aldirako enpresen % 9,7k soilik uste duela egoerak hobera egingo duela, 2025eko lehen hilabeteetan baikorrak ziren % 14ren oso azpitik. Hala ere, hobekuntza aurreikusten duten enpresen ehunekoa txikiagoa bada ere, ia erdiek egonkortasunaren alde egiten dute. Horrek erakusten du euskal erakundeek jarrera zuhurra dutela.

Garrantzitsua da adieraztea enpresek ingurune ekonomikoari buruz duten pertzepzioa ez dela kontuan hartzen Enpresa Konfiantza Indizea lortzeko.

Fakturazioaren eta eskaeren bilakaera

Enpresen fakturazioa ere adierazle garrantzitsua da Enpresa Konfiantza Indizea lortzeko. 2024ko itxiera positiboaren ondoren, datu hori jaisten hasi zen urtea. Hala ere, egungo datuek argi eta garbi erakusten dute 2025eko lehen hiruhilekoarekin alderatuta hobera egin duela, joera positiboari berriro helduz eta euskal erakunde gehienek posizio indartuan jarraitzen dutela adieraziz.

Epealdi horretan, inkestan parte hartu duten enpresen % 32,2k irizten du beren fakturazioa hobetu egingo dela 2025eko lehenengo hiruhilekoan zehar, aurreko hiruhilekoan baino ia 12 puntu gehiago (% 20,7). Beheranzko joeran daude egonkortasuna aurreikusten dutenak eta datu horretan atzerakada aurreikusten dutenak, % 57,4 (% 64,5 aurreko aldian) eta % 10,4 (aurreko hiruhilekoan baino 4 puntu gutxiago), hurrenez hurren.

Bestalde, positibismoa aurreko adierazlean bezain nabarmena ez den arren, eskaerei buruzko espektatibek ere hobekuntza txiki bat erakusten dute aurreko hiruhilekoarekin alderatuta. Kasu honetan, enpresen % 25 baikor agertzen dira eta eskarien bolumena areagotzea espero dute, % 60,4k egonkortasuna aurreikusten du eta % 14,6k eskariek behera egingo dutela aurreikusten dute.

Jarduera eta prezioak

Jarduerari buruzko aurreikuspenek goranzko joera berri bat erakusten dute, urtearen hasieran izandako atzerakada txikiaren ondoren. Aurreikuspen horien arabera, enpresen % 32,4k uste du 2025eko bigarren hiruhilekoan hobekuntza izango dutela. Datu hori % 16,7koa zen urtearen hasieran. Baikortasun horren ondorioz, erakundeek 2024an eta 2025aren hasieran zituzten plan estrategikoek eragina dute. Hala ere, inkestatutako euskal enpresen ia % 10ek ikuspegi negatiboa du datu horretan, eta % 57,9k, aldiz, egonkortasuna espero du.

Prezioei dagokienez, enpresen % 30,7k prezioek gora egingo dutela usten dute, eta % 64,1ek egonkor mantenduko direla aurreikusten dute. Datu horiek indartu egiten dute euskal enpresa gehienek prezio-politiketan beheranzko aldaketa handirik aurreikusten ez dutelako ideia, % 5,2ko gutxienekoarekin.

Errentagarritasun eta inbertsioen aurreikuspenak

Enpresek burututako eragiketen errentagarritasunari buruzko espektatibak ere funtsezkoak dira Enpresa Konfiantza Indizea eskuratzeari begira. 2024an hainbat hiruhilekotan ikuspegi ez oso ona izan ondoren, 2025eko lehen zati honetarako positibotasun-zirrikituak ikusten jarraitzen dugu. Kasu horretan, inkestatutako enpresen % 78,4k uste du berdina edo txikiagoa izango dela. Hala ere, % 21,5ek espero du oraindik etekin handiagoak lortzea, aurreko hiruhilekoan baino ia 6 puntu gehiago, orduan % 16tik gorakoa baitzen.

Inbertsioaren adierazlea aurreko aldietan bezain handia ez bada ere, erakundeen inbertsio-planei dagokienez zuhurtasun positiboa erakusten jarraitzen da. Konpainien % 17,1 baikor ageri dira, eta etekinak areagotu egingo direla uste dute, % 73,2k berdin mantentzea espero du, eta soilik % 9,2k aurreikusten du beherakada. Datu horiek, epe laburrean, inbertsioarekin lotutako erabakiei begira zuhurtziazko ikuspegia islatzen dute.

Enplegua enpresetan

Enpleguaren sorrera ere kontua izateko alderdi oso garrantzitsua da. Datu horrek egonkortasuna erakusten jarraitzen du enpresa-ikuspegiaren funtsezko ezaugarri gisa. Euskal erakundeen % 82,4k beren plantilla mantentzea aurreikusten du, % 14,6k areagotzea aurreikusten du, eta % 3k plantillak behera egitea espero du.

Jarraian Enpresa Konfiantza Indizean sartzen ez diren arren, etorkizunera begira eszenario ekonomiko hobea begitantzea laguntzen duten zenbait alderdiren azterketa aurkezten da.

Esportazioen portaera

Ohikoa denez, lehen adierazlea euskal enpresen esportazioek azken urtean izan duten bilakaera da, kasu honetan positiboa. Horrek erakusten du nazioarteko merkataritzak garrantzia hartzen jarraitzen duela hazkundearen motor gisa. Kasu horretan, baikor agertu diren eta atzerrian egindako salmentak hobetu egin direla uste duten enpresen portzentajea % 15,7ra iritsi da jadanik. Hala ere, inkestatutako erakundeen % 80k uste du egonkor mantendu direla, eta soilik % 5,6k ohartarazi du okerrera egin duela.

Berrikuntzak edo I+G ekimenak

Kontuan izateko beste parametro garrantzitsu bat berrikuntzara edo I+G ekimenetara bideratutako salmenten portzentajea da. Horri begira ikusten denez, gorabehera txikiak egon arren, aurreko hiruhilekoarekin alderatuz joera egonkor mantentzen da. 2025eko bigarren aldian, enpresen % 45,8k adierazi du ez duela baliabiderik bideratu atal horretan, eta, bitartean, % 20,5ek I+G ekimenetara bideratu du salmenten % 0 eta % 1 bitartean, eta % 7,7k baino ez du bideratu % 5 baino gehiago. Zifra horiek hobetzeko tarte handia badute ere, berrikuntzarekiko konpromisoa islatzen jarraitzen dute.

Kobratzeko epea eta banku-finantzaketa

Bezeroei kobratzeko epeak azken urtean lortutakoen antzeko kopuruetan jarraitzen du. EAEko erakundeen % 14,9k kobratzeko epea zabaldu egin dela dio, eta % 78k, berriz, esan du datu hori egonkor mantendu dela.

Amaitzeko, bezeroei kobratzeko epea bezala, banku-finantzaketa eskuratzeko erraztasuna ere konstante mantendu da azken urtean enpresen % 80,9rentzat (aurreko hiruhilekoan % 81,3 izan zen). Gainerakoak honela banatzen dira: % 7,4k uste du okerrera egin duela, eta % 11,6k uste du hobera egin duela.

Zuhurtasun-zantzu batzuek oraindik ere badiraute ere, Enpresa Konfiantza Indizeak eta adierazle osagarriek ikuspegi baikorragoa nabarmentzen dute euskal enpresen artean 2025eko bigarren hiruhileko honi aurre egiteko.

* Estatu Batuek muga-zergen politika berria ezarri dutela iragarri aurretik egindako inkesta.