Ezagutu motibazio profesionaleko azken teknikak

Motibazioa da dagoen gaitasun boteretsuenetako bat, bereziki esparru profesionalean. Motibazioari esker, pertsona batek bere mugak gainditu eta a priori lortzen oso zailak diruditen helburuak lor ditzake. Ezaugarri hori eraginkortasunaren eta produktibitatearen sinonimo da, baina, aldi berean, enpresek aurre egin beharreko erronka nagusietako bat da, batez ere mundu globalizatuan, lan-mugikortasuna gero eta handiagoa delako, eta erakunde askok talentuari eusteko arazoak dituztelako.

Motibazio profesionala sustatzen laguntzen duten hainbat faktore daude. Askotan, garrantzitsuena soldata dela pentsatzen dugu, baina badira motibazio horri eusten laguntzen duten oinarrizko beste arrazoi batzuk ere, horietako batzuk oso subjektiboak. Hona hemen horietako batzuk:

• Egiten den lanarekiko gogobetetasuna. Pertsona batek bere ezaugarrietara hobekien egokitzen den lanpostua betetzen duenean, eta gogoko duen eta bere prestakuntzarekin lotuta dagoen eginkizuna betetzen duenean, litekeena da bere burua ase sentitzea eta bere motibazio profesionala bizirik mantentzea.
• Mailaz igotzeko aukerak. Enpresa batean gora egiteko aukera motibazioz lan egiten laguntzen duen beste faktore garrantzitsu bat da.
• Laneko konfiantza eta malgutasuna. Konfiantza pertsonalak, hau da, negoziatzeko marjinak eta laneko malgutasunak, asko laguntzen du pertsonek enpresarekin duten inplikazioa handitzen eta errendimendua hobetzen.

Motibazio profesionaleko teknika berriak Hala ere, lan-egitura gero eta sofistikatuagoa, digitalizazioaren inpaktua eta etengabe prestatzen jarraitzeko gero eta premia handiagoa direla eta, enpresek motibazio profesionaleko teknika berritzaileagoak erabili behar dituzte:

1. Parte-hartzea da gakoa. Langileei alde bakarretik eta noranzko bakarrean jakinarazitako erabakiak iraganeko kontua dira: erabaki horien ondorioz, gutxiespen-sentsazioa helarazteaz gain, enpresa osatzen duten kideek beren interesekin zerikusirik ez duen zerbait balitz bezala ikusten dute enpresa. Erakundeek ahalegin handia egin behar dute beren erabaki asko langileen inplikazioarekin adosten saiatzeko. Tailerren, bileren edo bestelako dinamika parte-hartzaileen laguntzarekin, pertsonek beren bizitzei atxikitako zerbaiten gisa hartu beharko lukete lana. Lanak egunean zenbat denbora, ahalegin eta energia xurgatzen dituen baino ez dugu pentsatu behar. Inplikazio-plus hori eskaintzen duten pertsonek aintzatespena eta errespetua nahi dituzte beren lana konpentsatzeko, eta, horregatik, enpresek ez diete huts egin behar. Parte-hartze horren aldeko apustua eta sustapena sekulako motibazio-inbertsioa dira, eta berehalako itzulkina dauka produktibitatean.
2. Sariak eta aintzatespena motibazio-palanka gisa. Pertsona batentzat oso gauza gutxi daude bere lana esplizituki aintzatestea baino atseginagorik. Lan profesional bat aintzatesteko sariak ematea oso jardunbide arrunta da enpresen artean. Eta oso eraginkorra da motibazio profesionaleko mekanismo gisa. Sari horiek bidaiak, jolas-jarduerak edo opariak izan daitezke, baina sustapen profesionaleko mekanismoak ere aktiba ditzakete.
3. Gamifikazioa, edo jolastuz lan egitea. Gamifikazioa gero eta ohikoagoa da prestakuntza-prozesuetan, giza baliabideetan eta, batez ere, plantillak motibatzeko orduan. Digitalizazioaren ondorioz zabaldutako teknika da, eta enpresako hainbat jardueratan jolas-mekanikak aplikatzean datza. Tresna horiek funtsezkoak dira lantalde bateko kideen artean harremanak sendotzeko, eta, aldi berean, lehiakortasuna sustatzen dute erronkak gainditzeko orduan. Gainera, tresna horiek plantillako kide gazteagoen integrazioa errazten dute, eta barne-prestakuntzako planen aliatu handiak dira.
4. Pertsonak prestakuntzaren bidez zaintzea. «Prestakuntza garestia dela uste baduzu, probatu ezjakintasunarekin». Derek Bok Hardvardeko errektore ohiaren esaldi horrek modu grafikoan erakusten du hezkuntzak eta prestakuntzak edozein arlotan duten garrantzia. Prestakuntzan inbertitzea talentuan inbertitzea da, eta hori da pertsona batek eskain dezakeen aktiborik handienetako bat. Prestakuntza bereziki garrantzitsua da teknologiaren sektorean. Esparru horretan etengabekoak dira aurrerapenak, ia egunero gertatzen dira. Horregatik, aurkikuntza edo teknika berriek azkar-azkar gainditzen dituzte aurreko kontzeptuak, eta prestakuntza-eskakizun berriak eskatzen dituzte. Prestakuntza-lan horrek itzulkin ukaezinak ekartzen dizkio enpresari, hala nola gaikuntza profesionala, berrikuntza, produktibitatea eta, batez ere, motibazio profesionala. Atal horretan garrantzi handia hartu du «snack learning» izeneko modalitateak, eduki segmentatuagoak eskaintzen dituen prestakuntza-metodoa; izan ere, eduki horiek urrutitik eskura daitezke tresna digital berrien bidez.

Teknika horiek, enpatiarekin eta hurbiltasun pertsonalarekin konbinatuta, oso tresna baliagarriak dira enpresa batean motibazio profesionaleko mekanismoak aktibatzeko.