LKULTURA: Euskaraz zer irakurri, ikusi eta entzun bila bazabiltzate, hauek dira urriko gomendioak

Lagunok, harpidedunok, irakurleok: 

Euskaraz zer irakurri, ikusi eta entzun bila bazabiltzate, baditugu zuontzako gomendioak. Urrian, emakumeek egindako zinemaren gorazarre egiten duen pelikula harrigarri bat ekarri dizuegu, aspaldiko bi lagunen arteko emanaldi intimo eta oso berezi bat, eta askorentzat ezezaguna den errealitate batera hurbiltzeko aukera ematen duen podcast ezin interesgarriago bat. Eta horrez gain, hiru jaialdi gomendatzen dizkizuegu. Lehenak, euskal musikaririk handienak inoiz ez bezala entzuteko aukera emango digu. Bigarrenak, goizetik gauera kulturaz beteko du Usurbil. Eta hirugarrenak, Gasteizeko eszenatokietara ekarriko ditu nazioarteko lan bikainak eta euskaraz sortutako azkenak. 

📽️ Dokumentala

Arnasa betean

Zinemaldian estreinatu eta beste hainbat jaialditan egon ondoren iritsi da Primeran plataformara hiru urpekari gazteren bidez, euskal zinegileen munduan murgiltzera eta emakumeek egindako zinema ospatzera gonbidatzen gaituen pelikula orijinal eta harrigarri hau. 

🗣️ Solasaldia eta musika 🎶

Huntaz eta hartaz

Urriaren 25ean, Nafarroako Antzerki Eskolan, Pott Bandako kide izan ziren Joseba Sarrionandia eta Ruper Ordorikak kontzertu eta solasaldi arteko ekitaldia eskainiko dute, bi ordu eta erdiz, huntaz eta hartaz hitz egiteko aukera emango dien saio intimo eta berezia. 

🎙️ Podkasta

Transintonia

Aitzole Araneta sexologoak 20 urte zituen “Munstroa” testuan bere sufrimendua islatu zuenean eta bere esperientzia oinarri hartuta, EiTBren atarian estreinatu berri den podcast zintzo eta bikaina sortu du, pertsona transexualen errealitatea ezagutzeko eta ulertzeko ezinbestekoa. 

🎤 Musika jaialdia

Ura bere bidean

BECen, urriaren 25ean eta 26an, aukera ahaztezina egongo da Zea Mays, Doctor Deseo, Kalakan, Su ta Gar, Zetak eta beste hainbat artista Euskadiko Orkestra Sinfonikoarekin entzuteko, Fair Saturday fundazioak LABORAL Kutxaren laguntzarekin antolatutako jaialdian.

📚 Jaialdi kulturala

Booktegi jaialdia

Urriaren 26an, poesia irakurraldiak eta literaturari buruzko solasaldiak, antzerkia eta zuzeneko musika egongo dira Usurbilen, Booktegi Kultur Elkarteak hirugarren urtez antolatu duen egun osoko jaialdiaren baitan. 

🎭 Antzerkia

Gasteizko 49. Nazioarteko Antzerki Jaialdia

Petite, Matauco eta García Lorca antzokietan, 37 ikuskizun eskainiko ditu jaialdi honen 49. edizioak, eta euskaraz ikusi ahal izango dira Teatro Paraisoren Leihoak, Pez Limboren Ilargiaren alabak, Ékoma Teatroren Lohi gorria, eta Kulunka teatroren Hegoak.