Haurrentzako proposamenak euskaraz – 2026ko azaroa | LK Haurrak

Ume, haur, gazte eta ez hain gazteok! Euskaraz disfrutatzeko edukiak nahi dituzue?

Urrian, benetako heroia dela ezkutatu behar duen gaztetxo baten eguneroko gora-beherekin disfrutatzea proposatzen dizuegu, eta benetako heroien gisara portatzen diren oilo talde gogoangarri baten abenturekin. Zinemara joateko plan bat ere badugu, ia denetarik egiteko lagunduko dizuen webgune bat eta ipuinekin lotutako gomendio bi. Maitasunaren hizkuntza unibertsalari buruzko istorio ilustratu zoragarri bat, eta tradizioak bizirik mantendu dituen ipuinei bizitza berri eta interaktibo bat ematen dien aplikazio bat. 

🎞️ Telesaila

Henry Danger

Gaztetxoei zuzendutako Nickeloden katean 5 denboraldi izatera iritsi zen telesail honen 2. denboraldia estreinatu berri du Makusik, bere nortasuna ezkutuan mantendu behar duen superheroi baten istorio klasikoa, baina institutura doan nerabe batek protagonizatua.

📽️ Pelikula

Oilasko ihesa: Nuggetaren Egunsentia

Netflix plataforman euskaraz ikusi daiteke plastilinazko panpinekin egindako komedia zoragarri hau, jatorrizko Chicken run gogoangarriaren bigarren partea, konzentrazio-esparru bat zirudien oilatokitik ihes egin zuten oilo adoretsu eta maitagarrien hurrengo abentura.

📽️ Zinema

Gurenagi familiaren errezetak

Igorren, urriaren 25ean, Pantailak Euskaraz ekimenari esker, familia osoak disfrutatu ahal izango du Gurenagi familiarekin, eta, ekaitz baten ondoren, beraien food truck-a hartu eta hiri berri batean biziko duten abenturarekin.

💻 Tutorialak

Egingarriak

Maker filosofia oinarri hartuta, euskara hutsean egindako tutorialen lehen ataria sortu da, halako gauzak egiten dituztenek konpartitu ditzaten eta nola egiten diren ikasi nahi dutenek, pauso guztiak azaltzen dituzten argazkiak edo bideoak topa ditzaten.

📖 Ipuina

Ez da ahotsik behar

2 urtetik gorako haurrentzako ipuin benetan maitagarria, ilustrazio ezin ederragoen laguntzaz animali desberdinek beraiekin kumeei maitasuna nola adierazten dieten kontatzen duena, eta nola den maitasuna sentimendu unibertsal bat, mintzo asko dituen hizkuntza unibertsal bat.

📱Aplikazioa

Amattoren uzta

30eko hamarkadan, ahozko tradizioak bizirik mantendutako hainbat ipuin bildu zituen Amattoren uzta liburuak eta horietatik 3 dira Galtzagorri elkartearen eskutik, aplikazio honetan bizitza berri bat lortu dutenak, animazioaren eta interaktibitatearen bidez.