“Euskara Ibiltaria” erakusketa eta hitzaldia

Ba al zenekien euskal hiztun askorentzat “ardia” hitzak bi esanahi dituela? Bizkaieraren eragina duten zonaldeetan “ardia” hitzarekin artilea ematen duen animalia eta intsektu gogaikarri bat izendatzen dituzte. Beste zonalde batzuetan “ardia” artaldeetan ibiltzen den animalia da, besterik ez, aipatutako intsektuari “arkakuso”, “kakuso”, “kukuso” edo “kuküso” esaten baitiote. Baina bizkaitarrek badute beste hitz bat –oso onomatopeikoa– ganadu hori izendatzeko: “bekereke”.

“Euskara Ibiltaria” erakusketa eta hitzaldia

Hizkuntzaren transmisioan ahozko tradizioak garrantzi erabakigarria izan du, eta ondorioz, euskalkiek indar handia dute euskaran; eskualde mailako eta tokiko aldaerei dagokienez oso hizkuntza aberatsa da. Aberastasun hori guztia jaso nahi izan du Euskaltzaindiak herri hizkeren atlasean. 1986an ekin zion entziklopedia-lan horri, herriz herri bilketa-lan mardula eginaz, eta orain burutu du, paperezko edizioarekin eta atlas bikaina irakurtzeko eta entzuteko aukera eskaintzen duen bertsio digitala plazaratuta. Lan oso bisuala da, hitz baten erabileraren hedapena begiratu bakarrean ikusteko aukera eskaintzen duena.

Horregatik, hain zuzen, Beasaingo Udalak, Euskaltzaindiak eta LABORAL Kutxak erakusketa antolatu dute Gipuzkoako udalerri horretako Igartza jauregian. Maiatzaren 28tik ekainaren 5era bitartean, askotariko mapak izango dira ikusgai bertan, eta horiek lantzeko prozesuaren berri jasoko dute monumentu-multzo eder horretara bertaratuko direnek. Gainera, nahi duenak, “Euskara Ibiltaria” hitzaldia entzuteko aukera izango du inaugurazio egunean, 19:30etik aurrera.

Sarrera doakoa izango da, nahikoa da aldez aurretik 944 15 81 55 telefonora deitzea edo posta elektroniko bidez mezua bidaltzea info@euskaltzaindia.eus helbidera, joateko asmoa adieraziz.