Gabonetara begira, aukeratu tokikoa eta jasangarria den merkataritzako proposamenak

Heldu zaigu azaroa! Gabonak poliki-poliki hurbiltzen ari direnez, proposamen bat egin nahi dizugu: zer iruditzen zaizu aurtengo festak ezberdin egiten baditugu? Izan daitezela apur bat jasangarriagoak eta solidarioagoak, COVID-19ak gure inguruko hainbat pertsonengan izan duen eragina arintze aldera.

Prest al zaude? Oso erraza da: hemendik aurrera, ahalegindu gaitezen gure kontsumoa pixka bat arduratsuagoa izan dadin. Urteko sasoi honetan goia jotzen duen kontsumismoa hein batean geldiarazi nahi dugu, eta birziklapena eta tokiko kontsumoa sustatu. Hori lortzen laguntzeko, kontsumo arduratsua eta hurbilekoa bultzatzen dituzten ekimen batzuen berri emango dizugu. Hementxe bertan ditugu, etxetik gertu.

Koopera. Behin baino gehiagotan ikusiko zenituen edukiontzi zuri batzuk kalean, arropa, liburuak, jostailuak, altzariak, kiroletako gauzak, elektronikakoak eta beste asko birziklatzeko. Edukiontzi horiek Kooperarenak dira. Caritasen mende dagoen kooperatiben sarea da, eta gizartean baztertuta dauden edo horretarako arrisku-egoeran diren pertsonei laguntzen die. Erabiltzen ez ditugun gauzak biltzeko zerbitzu osoa du Kooperak. Bildutako gaien artean oraindik ere erabil daitezkeenak berreskuratu eta bere dendetan jartzen ditu salgai, prezio oso lehiakorretan. Salmentatik ateratzen duen dirua ekintza solidarioetara bideratzen du, eta berrerabili ezin daitezkeen gainerako gauzak energia ekoizteko prozesatzen ditu. Kate horretan sartzean, balio-bizitzaren amaierara iritsi ez diren produktuak birziklatzen parte hartzeaz gain, ingurumena hobetzearen alde egingo duzu, eta gizarteratzeko arazoak dituzten pertsona askori enplegua aurkitzen lagunduko diezu. Begiratu denda guztien kokapena esteka honetan.

0km-ko elikagaiak.  Arrazoi ugari dago hurbileko produktuak, 0km-ko elikagaiak esaten dietenak, kontsumitzeko. Lehenik eta behin, zure inguruneko produktuak erostean ekoizle txiki eta ertainei laguntzen diezulako, eta horrela sortzen den ekonomiak eragin zuzena duelako bertako ekipamenduetan eta zerbitzuetan. Gainera, ingurumena babesten laguntzen duzu, produktu horiek bide laburra egin behar dutelako ekoizten diren lekutik saltokietara iristeko, eta, ondorioz, berotegi-efektua duten gasen isurketa-maila oso apala da. Halaber, nekazaritzako eta abeltzaintzako ustiategi txikiek metodo naturalak erabiltzen dituzte landaketarako eta abereak elikatzeko, eta horrek elikadura-segurtasuna bermatzen laguntzen du. Gure inguruan 0km-ko produktuak merkaturatzen dituzten kooperatibetako batzuk dira honako hauek:

• Elikagunea. Artxara kooperatibak urte batzuk daramatza tokiko 0km-ko produktuak Azpeitian eta inguruetan banatzen. Euskal Herriko lehen sektorea eta elikagaiak sustatu eta kontsumo-eredua aldatzea ditu helburu. Gipuzkoako udalerri horretako Azoka Plazan kokatuta dago, eta 150 km-ko inguruan ekoiztutako elikagaiak bakarrik biltzen ditu.
• Ekhilur. Kontsumo-kooperatiba da eta aurten hasi da antolatzen. Ingurune hurbileko ekonomia sendotzea du helburu, tokiko sare komertzialen bidez eta Euskal Autonomia Erkidegoan zein Nafarroan merkataritzagune irekiak sortuz.
• Beigorri. Online denda hau baserriakm0 ekimenaren osagaietako bat da eta abeltzaintzako zenbait ustiategitako haragia eta haragi-produktuak eskaintzen ditu. Proiektuak arreta berezia eskaintzen die ekosistema zaindu, tokiko ekonomia sustatu eta kultura-ondarea iraunarazteari, eta teknikari-talde zabala du kalitateko eta I+Gko departamentuetan. Ustiategi gehienak Gorbeia, Aralar, Pagoeta, Aizkorri-Aratz, Valderejo eta Hernio inguruetan daude. Tokiko aukera Gabonetako otorduetarako.

Ternua. Kanpoan ibiltzeko arropa egiten duen Arrasateko marka horren balioen artean daude berrerabiltzea, jasangarritasuna eta ingurumenarekiko errespetua. Birziklatutako materialak erabiltzen ditu arropa egiteko, hala nola alfonbrak, arrantza-sareak, plastikozko botilak, lumak eta nekazaritzako hondakinak, eta tratamendu jasangarriak eta natura errespetatzen dutenak aplikatzen dizkie.

Iraunkortasunaren, hurbiltasunaren eta birziklapenaren alde egiten duen beste ekimenen bat ezagutzen baduzu, jakinarazi iezaguzu iruzkin baten bidez. Prest al zaude Gabonetan kontsumo jasangarria eta hurbilekoa egiteko?