Gure pasahitzak gogoratzeko aholkuak

Zenbat pasahitz erabiltzen dituzu normalean? Eta, are garrantzitsuago, zenbat gogoratzeko gai zara? Gaur egun hainbat eta hainbat gako erabiltzen ditugu eguneroko zereginetarako: posta elektronikoa, bankua, sare sozialak, aldizkari digitalak, telebista-plataformak, online musika-zerbitzuak, denda birtualak, etab. Ezinezkoa da denak buruz ikastea, bereziki batzuk ezinbestean aldatu behar ditugunean, zibereraso bat izan eta gero jasotako segurtasun-gomendioari jarraikiz. Internetekin hasi ginenean pasahitz errazak erabiltzen genituen, oro har beti pasahitz berdina, baina orain hamaika letra (maiuskula eta minuskulak txandakatuta) zifra eta ikur erabiltzea komeni denez, hieroglifoak dirudite benetan! Horrek pribatutasunari mesede egiten dio nabarmen, baina aldi berean zailago egiten zaigu guztiak gogoan edukitzea. Nola konpon dezakegu hori?

Pasahitzen gestoreak

Aukera hedatuena pasahitzen gestoreak dira; programak dira, batzuetan doakoak, eta hainbat webgune eta online zerbitzutan gure erabiltzailea eta gakoa administratzen laguntzen digute. Honako hauek daude ezagunenen artean: 1Password, Dashlane, RoboForm, Keeper edo LastPass. Funtzionamendu erraza dute, pasahitz guztiak datu-base batean biltegiratzen dituztelako; datu-base hori hodeian enkriptatua dago, pasahitz nagusi batekin babestua azken hori bakarrik gogoratu behar izateko. Eutsitako beste edozein euskarritara sinkronizatuta daude guztiak, aldatuz gero egunera daitezen. Gako seguruak sortzea ere ahalbidetzen dute, berriak asmatzen aritu gabe. Erosoak badira ere, gestore horiek arriskuak ere badituzte. Hacker batek gure pasahitz nagusia aurkitzen badu, gure gako guztietan sartzeko aukera izango duelako.

Pasahitza partekatzea

Beste aukera bat da pasahitzak bikotekidearekin edo familiakoekin partekatzea, ahazten ditugunean ez kezkatzeko. Ez diegu zergatik guztietarako sarbiderik eman behar, baina une jakin batean, bidaia batean adibidez, litekeena da gako jakin batzuk partekatu behar izatea izapide jakin bat egiteko. Hori egiteko modurik egokiena zein den baloratu beharko dugu kasu horretan. Erabilera bakar baterako, eskuz idatzitako post it xume batekin edo koaderno batekin nahikoa izan daiteke, baina luze joko duen ohiko erabilera bat aurreikusten badugu, hobe dugu Google Driveko dokumentu bat partekatzea, ondoren zabaltzeko eta eguneratzeko aukera emango diguna.

Zer gertatzen da pasahitz bat ahazten badugu? Zerbitzu edo plataforma bakoitzak pasahitza berreskuratzeko modu bat izaten du normalean. Laboral Kutxaren kasuan, Online Bankan edo LK Pay zerbitzuan sartzerakoan bi egoera gerta daitezke:

• Nire erabiltzailea ahaztu dut: Zure erabiltzailea berreskuratzeko, sartu atal honetan.
• Nire gakoa ahaztu dut: Gakoa berreskuratzeko, deitu 900 929 029 zenbakira (Telebanka). Astelehenetik igandera, 07:00etatik 24:00etara. LABORAL Kutxaren edozein bulegotan ere izango duzu gakoa lortzeko aukera.