Online erosketa seguruak: iruzurrak saihestu eta zure finantza-datuak babestu

Azken hamarkadan merkataritza elektronikoak izan duen gorakadak, batez ere pandemiaz geroztik, izugarri handitu ditu salmentak. 2024an % 18ko hazkundea izan zuen aurreko urtearen aldean Espainian. Gainera, salmenta nagusiak jada ez dira gertatzen Gabonak edo Black Friday bezalako une jakin batzuetan, baizik eta denboran zehar banatzen dira; izan ere, urtaroko merkealdietan erosteaz gain, ohitura bihurtu dugu era guztietako produktuak erregularki erostea: arropa, dekorazioa, higiene pertsonala eta supermerkatuko janaria ere bai.

Erosketa online egitea oso erosoa da, eta saltoki tradizionalean aurkitu ezin diren eskaintza batzuk lortzeko aukera ematen digu. Hala ere, hazkunde horrek arrisku batzuk ere baditu, hala nola iruzurrak edo datuen lapurreta. Horregatik, modu seguruan erostea funtsezkoa da iruzurrak, nortasun-ordezpenak eta datu-filtrazioak egiteko joera gero eta handiagoa duen ingurune digital batean. Hona hemen aholku batzuk interneten engaina ez zaitzaten.

Identifikatu konfiantzazko webguneak

Lehenik eta behin, ezagutu berri dugun edo WhatsApp bidez jaso dugun eskaintza sinestezin hori benetakoa dela ziurtatzea komeni da. Horretarako, kontuan izan honako alderdi hauek.

• URLaren egiaztapena: Ziurtatu webgunearen helbidea https://-rekin hasten dela ("s"-ak konexioa zifratuta dagoela adierazten du).
• Segurtasun-ziurtagiriak: Begiratu ea guneak giltzarrapoa duen helbide-barran. Negozioaren legitimitatea bermatzen ez duen arren, gutxieneko baldintza teknikoa da.
• Egiaztatu domeinua legitimoa dela: Adibidez: dendalaboralkutxateam.eus eta ez www.dendalab0ralkutxateam.shop.
• Online ospea: Denda ezagutzen ez baduzu, bilatu iritziak, sare sozialak edo ageriko kontaktua, benetakoa eta fidagarria dela ziurtatzeko.
• Susmo arruntak: Oso gehiegizko deskontuak daudenean edo testuaren idazketa urria denean, susmoa hartu.
• Azkar erosteko presioa: Gutxi irauten duten flash eskaintzak gure arreta erakartzeko eta erosketa inpultsiboak eragiteko trikimailuak dira, baina asko faltsuak dira.
• Itzulketa-politika: Gaur egun, edozein denda fidagarrik itzulketa- eta errenboltso-politika ona du, pozik ez bazaude produktua itzuli ahal izateko.

Ordainketa-metodo seguruak

Dendak konfiantza ematen badizu eta hor erostea erabaki baduzu, garrantzitsua da ordainketa-sistema segurua izatea.

• Saihestu zuzeneko transferentziak: Ez egin zuzeneko ordainketarik edo plataformatik kanpo.
• Hautatu kreditu-aukera: Kreditu-txartelek lege-babes hobeak eskaintzen dituzte.
• Erabili bitarteko fidagarriak: PayPalek, Apple Payk edo Google Payk segurtasun- eta babes-geruza gehigarriak eskaintzen dizkiote erosleari.
• Bi urratseko autentifikazioa: Aktibatu bi urratseko autentifikazioa zure bankuko appean, zure erosketa baieztatu behar izateko.

Hobetu zure zibersegurtasuna

Gure segurtasun digitala indartzea oso aholku erabilgarria da maila guztietan, ez erosteko orduan bakarrik. Honela lor dezakezu.

• Gailu eguneratuak: Mugikorraren edo ordenagailuaren bidez, zure gailuak, appak eta nabigatzaileak eguneratuta eduki behar dituzu, iruzurrak saihesteko.
• Saihestu sare publikoak: Erosterakoan, ez erabili wifi sare irekiak, kafetegietan, aireportuetan edo hoteletan ohikoak direnak, zibererasoak jasan baititzakete.
• Pasahitz seguruak: Erabili pasahitz bakarrak, luzeak eta konplexuak, pasahitzen kudeatzaileekin, ez errepikatzeko.

Online erosketak ugaritu ahala, zibererasoak ere ugaritu egin dira Espainian. Horregatik, ezinbestekoa da pribatutasuna eta segurtasuna zaintzea Internet bidezko edozein ordainketa egitean. Ziberiruzurrak gero eta sofistikatuagoak dira, baina arreta jarriz gero, erraz detektatzen dira. Hurrengo erosketa inpultsiboa egin aurretik, denbora pixka bat ematen baduzu dena zuzena dela eta zure gailuak ondo konfiguratzen dituzula egiaztatzeko, dirua aurrezteaz gain, susto batzuk ere aurreztuko dituzu. LABORAL Kutxa blogean zure zibersegurtasuna hobetzeko hainbat baliabiderekin lagundu nahi dizugu.