Zure kontua, zure arauak: saihestu besteek kontrola hartzea

Gero eta kontu digital gehiago erabiltzen ditugu informazioa kontsultatzeko, erosteko, komunikatzeko eta gure dirua kudeatzeko. Horrek ziberdelitugileek kredentzialak eta segurtasun-kodeak lortzeko duten interesa ere areagotu du.

Account takeover edo kontu-hartze eraso bat gertatzen da ziberdelitugile batek kontu digital batera sartzea eta bere legezko jabea balitz bezala erabiltzea lortzen duenean. Helburua iruzurrezko eragiketak egitea, informazio pertsonala lortzea, sartzeko kredentzialak aldatzea edo konprometitutako kontua beste zerbitzu batzuetara sartzeko erabiltzea izaten da.

Nola lortzen dute sartzea?

Ez da beti beharrezkoa sistemak zuzenean urratzea. Erasotzaileek askotan agerian geratutako kredentzialak baliatzen dituzte edo engainua erabiltzen dute; horretarako, hainbat zerbitzutan berrerabilitako pasahitzak probatzen dituzte, datuak eskuratzeko webgune faltsuak sortzen dituzte edo erakundeak ordezten dituzte posta elektronikoen, SMSen eta deien bidez. Horrela, presazko egoera baten sentsazioa sortzen dute informazioa lortzeko edo zuk eragiketa bat baimentzea lortzeko.

Kontuan hartu beharreko alerta-seinaleak

Baimendu gabeko sarbide batek hainbat arrasto utz ditzake. Aztertu arretaz zure kontuekin zerikusia duen ustekabeko edozein jarduera:

• Ezagutzen ez dituzun saio-hasieraren jakinarazpenak edo zuk eskatu ez dituzun egiaztapen-kodeak.
• Egin ez dituzun eragiketak, transferentziak edo erosketak.
• Zure pasahitzean, telefono-zenbakian edo posta elektronikoko helbidean egindako aldaketak.
• Zure kontura sartzeko bat-bateko zailtasunak.
• Berehala jarduteko edo eragiketa bat isilpean gordetzeko eskatzen dizuten mezuak.

Nola babes dezakezu zeure burua?

• Erabili pasahitz desberdinak eta sendoak zerbitzu bakoitzerako, eta aktibatu bi urratseko egiaztapena, betiere eskuragarri badago.
• Ez partekatu inoiz zure gakoak, ezta SMS bidez edo aplikazioaren bidez jasotako kodeak ere, nahiz eta horiek eskatzen dituenak bankuan lan egiten duela baieztatu.
• Sar zaitez banka digitalean helbidea zeuk idatzita edo aplikazio ofiziala erabilita. Ez sartu posta elektronikoz, SMSz edo beste aplikazio batzuetatik jasotako esteketatik.
• Eragiketa bat baieztatu aurretik, berrikusi kontu handiz zenbatekoa, hartzailea eta baimentzen ari zaren ekintza.

Zer egin zure kontura sartu direla susmatzen baduzu?

Kasu horietan, azkar jarduteak ondorioak mugatzen lagun dezake. Ez jarraitu mezu edo dei susmagarriaren jarraibideei:

1. Jarri harremanetan zure bankuarekin bere kanal ofizialen bidez.
2. Aldatu pasahitza konfiantzazko gailu batetik.
3. Berrikusi eragiketak eta kontuarekin lotutako datuak.
4. Saio irekiak itxi, zerbitzuak horretarako aukera ematen badu.
5. Aldatu beste zerbitzu batzuetako pasahitzak ere, pasahitz berdina erabili baduzu.

Gogoratu: Zure bankuak ez dizu inoiz eskatuko zure pasahitzak edo segurtasun-kodeak partekatzeko, zure kontua "babesteko". Mesfidantza da segurtasunerako lehen urratsa.