Iraultza teknologikoa. Etika, Humanismo eta Zientzia Elkarrizketak

Konferentzia sorta horretako lehen zikloak gai zoragarri bat izan zuen gogoetagai: iraultza teknologikoaren bi alderdiak. Zer ari gara sortzen, mundu hobea, konektatuagoa eta ezagutza eskuragarriago jarriko duena? Ala gezurrezko berriez betetako gizarte bat, non gure intimitatea interes pribatua duten korporazio multinazionalen esku jartzen dugun?

Iraultza teknologikoa. Etika, Humanismo eta Zientzia Elkarrizketak

Erantzunak, maiatzaren 11n, Donostian

Horretaz guztiaz, teknologiaren aukerez eta horren arrisku eta ziurgabetasunez mintzatu ziren, maiatzaren 11n, Donostian, alde batetik, filosofian doktore, ikertzaile eta matematikari bat eta, bestetik, fisikari bat, gure bizitzan guk uste baino presentzia handiagoa duen arlo batean aditua: adimen artifizialean. Lehena Javier Echeverría da, gaur egun ikerkuntza-irakaslea Ikerbasque Berrikuntzaren Euskal Agentzian eta iaz urteko euskal curriculumik onenaren Eusko Ikaskuntza-LABORAL Kutxa saria irabazi zuena. Bigarrena, Humberto Bustince dugu, Nafarroako Unibertsitate Publikoko Automatika eta Konputazio Departamentuko katedraduna.

LABORAL Kutxaren Etika, Humanismo eta Zientzia Elkarrizketen X. edizioa ireki zuen hitzaldia arratsaldeko Gipuzkoako hiriburuko Londres hotelean egin zen. Moderatzailea Xabier Goicoechea izan zen, Donostialdea ESIko zuzendariorde medikoa (azken urteotan ziklo hauek bultzatu dituen erakundeetako bat da Donostialdea ESI).

Hamar urteko elkarrizketak eta gogoetak

Orain hamar urte, hainbat ezagutza-arlotako adituak bilduko zituen eztabaidarako eta pentsamendurako foro bat sortzeko asmoa bultzatu genuen LABORAL Kutxan, haiei entzun eta haiekin hitz egiteko helburuarekin. Aditu horiek bokazio humanista izan behar zuten, baita interes handiko ibilbide profesionala ere, bai zientziaren alorrean, bai publiko handiarentzat interes orokorrekoa izan zitekeen beste arloren batean. Areago, haien elkarrizketak gai izan behar zuen gaurkotasuneko eztabaida handietakoren batzuk argitzeko eta bizi garen mundua, aldaketa sozialak eta teknologikoak direla eta etengabe asaldatuta dagoena, hobeto ulertzeko.

Orain, hamar urte geroago, Etika, Humanismo eta Zientzia Elkarrizketak errealitate bat dira, eta harro senti gaitezke haietaz; izan ere, urtez urte, oso gai interesgarriez hausnartzeko aukera eman digute, hala nola emozioak kudeatzeko dugun gaitasunaz, osasun publikoan egiten den minaren tratamenduaz eta hezkuntzaren mugez. LABORAL Kutxan horrelako ekimenak bultzatzen jarraituko dugu; izan ere, aukera ematen digute gizarte-lanaren esparruan gure ekarpena egiteko sortu gintuen eta hainbeste zor diogun gizartearen aurrerabideari.