Lan egiten eta nire erretiro-pentsioa kobratzen jarraitu nahi dut. Posible al da?

Premiagatik, hau da, erretiro-pentsioa hileko gastu guztiei aurre egiteko nahikoa ez delako, edo aukeratutako lanbidean lan egiten jarraitu nahi delako, gero eta pertsona gehiagok jakin nahi dute lana eta erretiro-pentsioa zer baldintzatan izan daitezkeen bateragarri. Ba al da pentsioarekin bateragarria ez den lanbiderik? Zer salbuespen gehiago daude? Posible al da pentsio osoa kobratzea? Jarraian, funtsezko galdera horiek erantzungo ditugu.

Egin al daiteke lan pentsiodun izanik?

Bai, posible da. Printzipioz, lan egiten zuten pertsonek ezin zituzten erretiro-pentsioak kobratu, baina arau horren salbuespenak gero eta gehiago dira eta, gaur egun, erretiroa eta lana bateragarriak izan daitezke, erretiro partziala edo erretiro malgua eskatzen bada, norbere kontura nahiz besteren kontura lan egin, edo Administrazioarentzat lan egin. Hori bai, kasu jakin batzuetan bakarrik.

Zer kasutan izan daitezke bateragarriak?

Lehen baldintza legezko erretiro-adina eta oinarri arautzailearen % 100 beteta izatea da, hau da, pentsio osoa jasotzeko eskatzen diren gutxieneko kotizazio-urteak beteta izatea. 2013an, adin hori 65 urte eta hilabete batekoa zen, eta, oinarri arautzailearen % 100era iristeko, 35 urte eta 6 hilabete kotizatu behar ziren.

Hortik aurrera, honako hauek dira pentsioa kobratzearen eta lan egiten jarraitzearen arteko bateraezintasuna ezartzen duen arau orokorraren salbuespenak.

• Erretiro malguaren modalitatea aukeratu eta pentsioa lanaldi partzialeko kontratu batekin bateragarri egin daiteke. Gizarte Segurantzaren webgunean bertan azaltzen den moduan, pentsioaren zenbatekoa murriztu egingo da, lanaldiari aplikagarria zaion murrizketaren alderantzizko proportzioan.
• Norbere konturako lanak ere egin daitezke, betiere urteko diru-sarrerek urte osoko lanbide arteko gutxieneko soldata (LGS) gainditzen ez badute.
• Besteren kontura zein norbere kontura egindako edozein lanetan, betiere pentsioa arauak finkatutako adina bete ostean jasotzen bada (adinaren aurrerapenik edo hobaririk gabe) eta eragindako pentsioaren zenbatekoa zehazteko dagokion oinarri arautzaileari aplikatu beharreko ehunekoa % 100era iristen bada. Zenbat kobratuko duzu pentsiodun gisa? Oro har, pentsioaren % 50.

Zer egin behar dut modalitate horien onuradun izateko?

Ezinbestekoa da Gizarte Segurantzara joatea, Administrazioari behar bezala jakinarazi behar baitzaio, kasu guztietan.

Lan egiten jarraituz gero, beherapenak izaten jarraituko dut sendagaiak ordaintzeko orduan?

Bai, lan egitea eta aldi berean pentsio bat kobratzea bateragarriak izan arren, pertsona langilea pentsiodun gisa hartzen jarraituko da, eta, horrenbestez, onurak izaten jarraituko du osasun-laguntza jaso eta sendagaiak ordaintzeko orduan.

Kotizatzen jarraitu behar al da modu horretara lan egiten den bitartean?

Oso gutxi. Legeak kotizazio sozialen zati handi bat egitea salbuesten du, baina % 8ko “elkartasunezko” kotizazioa ezartzen du, pertsona langileak % 2 bakarrik ordaindu behar badu ere (enpresak ordainduko du gainerako % 6a).

Egia al da etorkizunean pentsioaren % 100 kobratu ahal izango dela?

Posible da, baina, momentuz, legeak ez du alderdi hori aintzat hartzen. Pentsioaren % 50 lan ordaindu batekin bateragarri egitea ahalbidetzen duen gaur egungo legea 2013ko martxokoa da. Dena den, 2016an, Diputatuen Kongresuko Enplegu Batzordeak Gizarte Segurantzaren Lege Orokorra aldatzeko aukera aztertzea erabaki zuen, pentsioaren erdia ez ezik, pentsioaren % 100 bateragarri egiteko helburuarekin, norbere kontura lan egiten duten nahiz besteren kontura lan egiten duten pertsonen kasuan. Alderdi Popularrak aurkeztutako ez-legezko proposamena Toledoko Itunaren Batzordean eztabaidatu beharko litzateke, eta proposamen horrek gaur egungo gobernuaren babesa du, momentuz aurrera egin ez badu ere.

Eta gehiago jakin nahi badut?

Informazio zehatzagoa nahi baduzu, hona hemen Gizarte Segurantzaren webgunea. Bertan, lan ordainduaren eta pentsioa kobratzearen arteko bateraezintasun guztiak kontsultatu ahal izango dituzu. Eta, jakina, Gizarte Segurantzara joan eta nahi adina galdera egin ahal izango dituzu.