Aplikazioen pribatutasuna: zure informazioa babesteko letra txikia

Egunean zehar aplikazio asko erabiltzen ditugu. Baina, argi duzu aplikazio hauetatik zenbat diren seguruak? Zeintzuk eskura ditzakete zure datu pertsonalak? Gehiegizko baimenak dituzte?

Gure gailuetan deskargatzen ditugun aplikazioetako askok bigarren mailako funtzio askotarako sarbidea dute, eta horiek gure informazioaren segurtasuna arriskuan jar dezakete. Madrilgo Unibertsitate Politeknikoaren ikerketa baten arabera, aplikazio mugikorren % 80k baino gehiagok ez dituzte datuak babesteko legeak betetzen. Ba al dakizu nola prebenitu informazio-ihes horiek?

Zure informazioaren segurtasuna arriskuan jartzen duten baimenak

Zure gailuan aplikazio bat instalatzen duzun bakoitzean, aplikazio horrek zenbait baimen eskatuko dizkizu, funtzio jakin batzuetara sartu ahal izateko. Batzuetan, baimen horiek beharrezkoak dira aplikazioak behar bezala funtzionatzeko, baina beste batzuetan ez dira beharrezkoak, eta zure segurtasunerako ere arriskutsuak izan daitezke. Hauek dira zibererasorako erabiltzen diren baimen ahulenetako batzuk:

• Denbora errealeko kokapena: aplikazioari aukera ematen dio jakiteko non zauden edo zein diren zure eguneroko mugimenduak. Nabigazio- edo garraio-aplikazioetarako funtsezkoak dira, baina zure mugimenduak jarraitzeko bide bat izan daiteke, beste aplikazio baterako gaitzen badira.
• Kamera: argazki-, bideo- edo dei-aplikazioetarako funtsezkoa bada ere, funtzio hori beste aplikazio batzuetarako gaituz gero, baimenik gabeko grabazioak lor ditzake zure gailutik.
• Mikrofonoa: kamera-baimenekin gertatzen den bezala, baimen hori dei-aplikazioekin lotuta egon ohi da, bai audio-aplikazioekin, bai bideo-aplikazioekin. Hala ere, ziberdelitugileek baimenik gabeko grabazioetarako ere balia dezakete.
• Kontaktuak: baimen horrek gailuaren kontaktu-agendan sartzeko aukera ematen dio aplikazioari. Bertan, informazio pertsonala gordetzen da, hala nola telefono-zenbakiak edo mezu elektronikoak, spear-phishing erasoetarako interesgarriak izan daitezkeenak.
• Gailuan biltegiratutako fitxategiak: hau da, irudi-galeria edo gordetako dokumentu eta deskargak. Fitxategiak kudeatzeko aplikazio batzuek (adibidez, iCloud) sarbidea eska dezakete, baina funtsezkoa da hori mugatzea, informazio-ihesak saihesteko.

Zure gailua aplikazioen bidez baimendu gabeko sarbideetatik babestu nahi baduzu, jarraitu jardunbide egoki hauei:

1. Berrikusi baimenak aldian-aldian: egiaztatu ea gaitutako baimenak bat datozen aplikazioaren funtzioarekin.
2. Aztertu pribatutasun-politika: ziurtatu biltzen dituzten datuak eta zein helbururekin biltzen dituzten.
3. Deskargatu aplikazioak leku seguruetatik: instalatu soilik denda ofizialetako aplikazioak (Google Play edo App Store, esaterako).
4. Eguneratu aplikazioak: beren segurtasuna hobetu ohi dute, eta izan ditzaketen ahultasunak edo informazio-ihesak zuzendu.

Edozein baimen onartu aurretik, gogoratu zure buruari galdera hau egitea: Aplikazio honek benetan funtzio honetara sartu behar al du?