Beste 20 aukera ekarri ditugu bizikletaz egiteko ibilbideen zerrenda luzera, zentzumen guztiekin gozatzeko modukoak. Oraingoan Arabako ibilbideak dira. Dagoeneko 130 ibilbide baino gehiago ditugu Wikiloceko profilean

Berriro ere, zuek bidalitako ibilbideak erantsi ditugu Wikiloceko profilean. Oraingoan Arabako ibilbideak eskatu dizkizuegu, eta guztira 20 bidali dizkiguzue. Eskerrik asko gogoko dituzuen bazterrak partekatzeagatik!

Pedalkadaz pedalkada bizikleta-ibilbideen inguruko azken zozketara iritsi gara. Dakizuenez, hainbat hilabetetan LABORAL Kutxaren maillotaz, bidoiaz eta txanoaz osatutako sorta zozkatu dugu. Biziki eskertzen dugu zuen parte-hartzea; izan ere, horri esker, ibilbidez bete dugu gure Wikiloceko profila eta zuen ekarpenak mundu guztiarekin partekatu ahal izan ditugu. Oraindik ez al dituzu begiratu? Esteka honetan ikus ditzakezue:

LABORAL Kutxaren Wikiloc profila

Guztira, gure inguruko 130 ibilbide baino gehiago bildu eta 8 zerrendatan antolatu ditugu: «Familian egiteko ibilbideak», «Hasteko ibilbideak», «Paseatzeko ibilbideak», «Ibilbide gogorrak», «Hiri-ibilbideak», «Bizkaiko ibilbideak», «Gipuzkoako ibilbideak» eta «Arabako ibilbideak». Modu horretan, zuzenean jo dezakezue gustukoen duzuen ibilbide-motara.

Badakigu oraingoz ezin garela bizikletekin atera, eta, horrexegatik, hain zuzen, gogo biziz irtengo gara aukera dugunean. Zergatik ez gara hasten ahal dugunean egingo ditugun ibilbideen zerrenda prestatzen?BISITATU GURE WIKILOC-EKO PROFILA ETA HASI PLANIFIKATZEN HURRENGO BIZIKLETA-IRTEERAK. 130 IBILBIDE BAINO GEHIAGO DITUGU KIROLARI GUZTIEN GOZAMENERAKO

Oraingoan Arabako ibilbideak eskatu ditugu, eta era guztietako bideen berri jaso dugu. Eraztun berdea, Gujuliko ur-jauzia, Sasetako haitzartea, Landako urtegia, Opakua, Arabako Errioxa… Ezagutzen al dituzue leku eder horiek? Erantsi ditugun ibilbideetan horiek guztiak eta gehiago ikusiko dituzue.

Apirileko ibilbide irabazlea: «Eraztun berdea», Maider Rotaetxek bidalitakoa

Aisialdirako natura-eremu handia sortuz Gasteizko kanpoaldea oneratzeko proiektu baten emaitza da Eraztun Berdea. Jakina, leku paregabea da kirola egiteko. Izan ere, oinez eta bizikletaz egiteko moduko 90 km ditu. Irabazi duen ibilbideak bira ematen dio eraztun berdeari, eta ia desnibel positiborik gabeko 30 km inguruko bidea da. Ibilbide osoa esteka honetan kontsultatu dezakezue:

Gasteizko Eraztun Berdeari bira

Esan dizuegunez, hau izan da, oraingoz, ibilbideen inguruan egin dugun azken zozketa. Asko eskertzen dugu zuen parte-hartzea eta ahal bezain laster ibilbideez goza dezazuen espero dugu.