LKHaurrak: Euskaraz disfrutatzeko haurrentzako edukien 2025eko urtarrileko gomendioak

Ume, haur, gazte eta ez hain gazteok! Euskaraz disfrutatzeko edukiak nahi dituzue?

Urtea ondo hasteko, bertsolari historiko bati buruzko antzerki lana dakarkizuegu, zeruak ertzik ote duen jakin nahi duen dragoiari buruzko pelikula eta Rasputin piratak itsasoan aurkitu zuen naufragoari buruzko nobela grafikoa. Horrez gain, buru osasunari lotutako korapiloak askatzen lagun dezakeen podcast bat gomendatu nahi dizuegu, eta bigarren hezkuntzan eskaintzen diren edukiak osatzeko webgune lagungarri bat. Azkenik, 2025ean ere urteak betetzeko asmoa baduzue, badakigu non ospatu dezakezuen urtebetze berezi eta ezohiko bat.

🎭 Teatroa

Moko, Indalecio Bizkarrondo Bilintx

Urtarrilaren 10etan eta 11an, Donostiako Antzoki Zaharrean Gorakada taldeak Bilintx bertsolari historikoaren biografian oinarritutako lana estreinatuko du, bereziki, bere haurtzaroan izan zuen istripuan eta istripu horrek eragindako ondorioak kontatzen dituena.

📽️ Pelikula

Dragoiaren gidaria

Gizagiengandik ezkutatuta bizitzeaz nekatuta dagoen Firedrake dragoiaren da eta Gorritxo bere lagunaren abenturak kontatzen zaizkigu Makusi plataformara heldu berri den pelikula honetan eta egun batean, nola abiatzen diren biak Zeruaren Ertza izeneko dragoien santutegiaren bila.

📒 Literatura

Itsaso gaziaren balada bat

Nobela grafikoen historian ezinbestekoak dira Hugo Pratt marrazkilaria eta Corto Maltese, bere pertsonairik ezagunena eta orain, Astiberri etxeari esker, euskaraz irakur daiteke abenturazale karismatiko eta ezohiko honen lehenbiziko istorioa, mundu osoan ezagun egin zuena.

🎙️ Podcasta

Korapiloak

Buru osasunari lotutako korapiloak askatzen laguntzeko hainbat onbidatu elkarrizketatzen ditu EiTBren podcast honetan Iñigo Antsorregi gidariak, Nire minaren etxean liburuan bere depresioaz luze eta zintzo hitz egin zuen idazle eta gidoilariak.

🌐 Webgunea

Berria ikasgela

12-18 urte bitarteko ikasleei zuzendutako webgune honetan, Berria egunkariko lantaldeak landutako irakurgaiak, bideoak, infografiak eta audioak eskaintzen dira, gaika eta formatoaren arabera sailkatutakoak eta ikasgaiak osatzeko aproposak izan daitezkeelako aukeratuak.

🎂 Urtebetetzea

Zirkozaurre

Zirkoarekin zerikusia duten diziplinak irakasteko eta zirkoari lotutako sormena bultzatzeko sortu zen Bilboko Zorrozaurreko espazio honek aukera ematen die adin guztietako haur eta helduei ordu eta erdiko zirko-tailer batekin ezin urtebetetze bereziagoa ospatzeko.