Kaixo!

Euskadiko Kutxak eta Ipar Kutxak ezinbestean ulertu behar genuen elkar. Kooperatibak gara, antzeko ingurune geografikoan egiten dugu lan, eta gizartean dugun funtzioa aberastasuna sortzen laguntzea dela uste dugu. Beti izan dugu argi ez garela negozio hutsa. Nahitaezkoa zen denborarekin proiektu komunean bat egitea. Duela hilabete batzuk bat-egitea gauzatu genuenetik enpresa bakarra gara legearen arabera, baina gure batasuna paperetatik haratago eraman behar genuen. Orain batera goazela erakutsi nahi genuen, indartsuagoak garela eta hobeto defenda dezakegula gure izaera mundu gero eta globalizatuagoan. Horregatik, marka (Laboral Kutxa), logoa eta bloga estreinatu ditugu. Cajalaboralcontigo.com eta Ipar Kutxaren bloga egiten genituen profesionalok elkarren ondoan arituko gara gune berri honetan. Zurea ere badela senti dezazula nahi dugu.

Sei urte eskaseko aldearekin sortu ziren Euskadiko Kutxa eta Ipar Kutxa, 1959an eta 1965ean hurrenez hurren. Egun, mende erdi geroago, elkar hartuta, lehen euskal kreditu-kooperatiba eta estatuko bigarrena gara. Gure negozio-bolumena 24.564 milioi eurokoa da (eta gure fondo propioak 1.379 milioikoak), eta horretan Euskadin Kutxabank eta BBVA bakarrik ditugu aurretik. Hori guztia euren aurrezkiak gure esku utzi dituzten 1.300.000 bezerori zerbitzua eskaintzeko. Ez da gutxi, kooperatiba-izaerari eta gauzak bestela egiteari uko egin ez dioten bi erakunderentzat.

Saiatu gara bat-egitea ahalik eta arinena eta mailakatuena izaten. Horretarako denbora hartu dugu. Duela urtebete baino lehenago hasi ziren bi erakundeen arteko elkarrizketa formalak, gaur egun Laboral Kutxa dena sortzeko helburuarekin. 2012ko martxoa eta azaroa bitartean, desagertu ziren erakundeen arteko komisioak eta informatika-ekipamenduak akoplatzeari ekin genion. Azpiegitura osoa biribildu beharra zegoen, plazaratzeko orduan gure irudi berria azala bakarrik izan ez zedin. Logo berriak integrazio sakonagoa adierazi behar zuen, burututako bat-egitea.

Antzeko ingurune geografikoan lan egiten genuen bi erakunde izanik, kasu batzuetan sukurtsalen bat itxi behar izan dugu, zerbitzua hurbileko beste batean eskain genezakeelako. Kasu horietan lan-bazkideen aurre-erretiroen bidez doitu ditugu langile-taldeak. Bazkide bakar batek ere ez du lanpostua galdu arrazoi horregatik. Gaur egun 2.500 lagunek egiten dute lan Laboral Kutxa entitatean. Gehienak kooperatibistak dira eta, beraz, boto-eskubidea dute entitatearen organo gorena den Batzar Nagusian.

Bezeroak ere protagonista dira Laboral Kutxa entitatean

Bat-egitearekin lortu nahi dugun helburua, adierazi izan dugunez, honako hau da: “gizarte-ekonomiako finantza-entitate baten proiektua sustatzea, jorratzen dituen merkatuak finantza- eta aseguru-zerbitzuez hornitzen diharduena, betiere, gaur egun estatuan ematen ari den finantza-sistemaren bankarizazio-prozesuaren aldean bestelakoa den eredua oinarri hartuta”. Bestelakoak gara eta horretaz harro gaude. Mende erdiz eutsi diogu izaera horri, eta gutxienez beste horrenbeste denbora irauteko zimenduak jarri ditugu bat-egitearekin. Ez diogu uko egingo garena izateari.

Edonon eta edonondik

Sorreratik abian ditugun 380 sukurtsaletan baino gehiagotan aurkituko gaituzu, Euskadin, Nafarroan, Aragoin, Errioxan, Gaztela eta Leonen, Kantabrian, Asturiasen eta Madrilen.  Baita ere, beti bezala, gure telefono eta Internet bidezko banku-zerbitzuetan.

Eta, noski, blog honetan. Bertatik, mundua ikusteko dugun modua erakutsi nahi dizugu, eta zuk zeure kezkak adieraz diezazkiguzun. Post bakoitzarekin gure izaera eta egunerokotasuna apur bat gehiago ezagutuko dituzulakoan gaude. Berriro jaio garenez, gazte sentitzen gara berriz, 54 urte beteak baditugu ere.

Ilusioz beterik heldu diogu aurretik dugun abenturari, eta zure galderak, animoak eta, batez ere, hobetzen lagunduko diguten kritikak jaso nahi ditugu. Ba al zatoz gurekin?