LABORAL Kutxak Kosta Trail babestu eta lasterketarako 5 dortsal zozkatuko ditu

Izen-emateko epea irekita dago eta data egutegian jarrita: ekainaren 15ean egingo da Kosta Trail mendiko lasterketa solidarioaren IX. ekitaldia, Uribe Kostako mendi eta itsaslabarretatik zehar, eta bertan bilduko den dirua esklerosi anizkoitzaren aurkako borrokara bideratuko da. Itsas mailako lasterketa da, era askotako lurrak zeharkatzen dituena (asfaltoa, belarra, hondarra eta harkaitza) eta, zalantzarik gabe, paisaia aldetik oso interesgarria.

Aurten berritasunak izango dira hiru ibilbideetan: 30 km-ko mendi-lasterketa, 20 km-ko martxa eta 11 km-ko familientzako martxa. Lehen aldiz, hiru ibilbideak zirkularrak izango dira, Sopelan hasi eta amaituko baitira. Bertako Udala arduratuko da aurreikusi diren 4.000 kirolarien beharrei erantzuteaz. Beraz, iaz baino 500 bat partaide gehiago espero dira aurten.

Parte hartu nahi dutenek ekitaldiaren web-orrialdean eman dezakete izena –ibilbideari buruzko informazio osatua aurkituko dute bertan-, edo Forum Sport saltokietan, edo hobe oraindik, gure Facebookeko lehiaketan parte har dezakete eta zozkatuko ditugun 5 dortsaletako bat irabazi.

Esklerosi anizkoitzaren aurka

 Urtero legez, LABORAL Kutxak, Forum Sportek eta Salomon etxeak babestutako Kosta Trail lasterketan bildutako dirua Esklerosi Anizkoitzaren Eugenia Epalza Euskal Fundaziora bideratuko da. 2001. urtetik, gaixotasunaren berri ematea eta gizartea horren aurrean sentsibilizatzea du xede 2.200 lagun baino gehiagoren ordezkari den Fundazioak. Aurreko ekitaldian Kosta Trailek 12.500 euro eman zizkion Fundazioari, eta aurten, zazpigarrengoz, Euskadin eta Estatuan Esklerosi Anizkoitzaren gaian erreferentziazkoa den erakundeak jasoko du lasterketan bildutako dirua.

Eugenia Epalza Fundazioak errehabilitazio- eta gizarte-zerbitzuak finantzatzeko erabiliko du diru hori, eta baita ere, gaitz neurologiko sendaezin hori duten gaixoei arreta psikologikoa eskaintzeko, helduen eta gazteen artean mota horretako gaixotasun ohikoena eta desgaitasun-eragile nagusia baita. Gaur egun 2.200 lagunek pairatzen dute Esklerosi Anizkoitza Euskadin, eta horietatik 1.200 Bizkaiko bizilagunak dira.