Zer egin nire mugikorra desagertu egin da edo lapurtzen dizutenean

Azken finean, zure bizitza osoa duzu bertan. Zure kontuen informazioa dago, ordainketak egiteko erabiltzen duzu, eta lan-erreminta ere izan daiteke. Horrelakoetan, zer egin?

Lehenik eta behin, ez izutu.

Hasteko, egiaztatu zure mugikorra beste norbaitek duen: deitu zure telefono-zenbakira. Beharbada beste pertsona batek erantzungo du, aurkitu egin duelako. Horrela ez bada eta “itzalita edo estaldurarik gabe” badago, litekeena da asmo txarragoak dituen beste norbaiten eskuetan egotea. Orduan, mugitzen hasi behar duzu, larritu gabe, baina denborarik galdu gabe. Terminala berreskuratzea oso zaila izango da; baina, gutxienez, mugikorra duenak ez dezala erabilera txarrik egin, eta saia zaitez, ahal den neurrian, zure datuetan sartzen ez uzten. Jarraian, zein urrats eman behar dituzun azalduko dizugu, Android sistema eragileko mugikor bat baduzu nahiz iPhone bat baduzu.

Aldatu zure pasahitz guztiak

Mugikorrean kontaktuak, argazkiak, mezuak, elkarrizketak eta abar gordetzen dituzu. Zure bizitzaren zati bat da eta, askotan, ezinbesteko lan-tresna ere bai. Gainera, zure gailuan Google-era, Whatsappera, Facebookera, Instagramera, Paypalera eta beste aplikazio batzuetara sartzeko app-ak izango dituzu beharbada. Oso garrantzitsua da horien guztien pasahitzak aldatzea, automatikoki aplikazio guztietako saioak itxiko baitira. Berriz martxan jartzeko, gailuak pasahitz berriak eskatuko dizkizu eta, jakina, pasahitz horiek ez ditu beste inork ezagutuko.

Jarri salaketa polizia-egoitzan

SIM erabilezin bihurtu eta pasahitzak aldatu ondoren, zure mugikorra duenak zure informaziora sartzeko aukera asko galduko ditu. Orduan, salaketa jartzeko unea da. Horretarako, zure IMEI kodea beharko duzu, mugikorraren “matrikula” edo NAN zenbakia, identifikatzaile bakar bat: telefonoa ezgai bihurtzeko balio du eta gailuaren kaxan agertzen da. Operadoreak ere izan dezake, zure terminala haren bitartez eskuratu bazenuen.

Blokeatu eta ezabatu edukia

“Google Aurkitu nire gailua” edo beste aplikazio bat ─Cerberus App, adibidez─ hura lokalizatzeko gai bada, Blokeatu sakatu behar duzu. Eta galdutzat ematen baduzu, edukia beste pertsona batzuen esku ez geratzeko, Ezabatu sakatu behar duzu. Itzalita badago, datu guztiak desagertu egingo dira berriz piztean. Une horretatik aurrera, zeuk ere ezin izango diozu aztarnari jarraitu “Aurkitu nire gailua” aukeraren bidez. Izan ere, edukia beste ezer baino lehen blokea eta ezaba dezakezu, egokia iruditzen bazaizu.

Ez ahaztu zure operadoreari jakinaraztea eta lapurtu dizuten gailua IMEI bidez blokeatzeko eskatzea.

Zer egin zure mugikorra Android bat bada

Lehenik eta behin, zure mugikorra lokalizatzen saia zaitezke. Oso erraza da kokalekua aktibatuta badu; sartu “Google -> Aurkitu nire gailua” aplikazioan edozein mugikor edo ordenagailutatik. Aurkitzen ez baduzu, ez galdu denborarik:

• Blokeatu mugikorra ‘Aurkitu nire gailua’ sisteman bertan. Mugikorra pizten duen pertsonak ikusiko duen mezu bat idatzi ahal izango duzu (adibidez: “Deitu telefono-zenbaki honetara itzultzeko”).
• Deitu zure operadorera eta baliogabetu SIM txartela. Horrela, zure mugikorra duenak zure kontura deirik ez egin ahal izatea lortuko duzu.
• Eskatu txartelaren kopia bat zure telefono-zenbakia beste terminal batean erabili ahal izateko.

Zer egin iPhone bat bazenuen

Sartu galdutako gailuak bilatzeko iPhonen orrian. Zure iCloud pasahitza beharko duzu eta, haren bitartez, zure terminala bilatzeko eta gailua urrutitik blokeatzeko Galduta Modua aktibatu ahal izango duzu. Era berean, Jakinarazi aurkitzen denean izeneko erlaitz bat duzu. Aktibatzen baduzu, mezu elektroniko bat jasoko duzu gailua martxan jartzen den unean bertan. Hori gertatzen bada, mapa batean lokalizatu ahal izango duzu mugikorra.

Hurrengo urratsak Android mugikorraren kasuan azaldu dizkizugun berberak dira. Telefonoaren IMEI kodearekin poliziarengana joan eta salaketa jarri behar duzu. Gero, zure operadorearekin jarri behar duzu harremanetan, lapurretaren berri eman eta konpainiak gailua guztiz blokea dezan, gailuaren IMEI kodea erabiliz. Ez galdu salaketa, beharbada eskatu egingo dizute eta.

Aldez aurretiko gomendio txiki batzuk

Denoi gerta dakiguke mugikorra lapurtzea edo galtzea. Horregatik, hobe da erosi bezain laster gomendio jakin batzuk betetzea. Oso gomendio baliagarriak dira, ikusiko duzun bezala.

• Bete larrialdietarako informazioa. Horrela, zure mugikorra aurkitzen duenak nori itzuli jakingo du. Web-orri honetan, nola egin azaltzen dute, iPhone nahiz Android mugikorren kasuan.
• Zure mugikorra Android bat bada, aktibatu “Utzi beste gailu batzuei nire telefonoa aurkitzen” aukera mugikorra martxan jarri ondoren. Funtzio hori aurkitzeko, joan Doikuntzak leihora eta aukeratu Segurtasuna.
• Zure mugikorra iPhone bat bada, Apple-ek urrutitik babesteko sistema bat du. Sistema hori gailua lehenengoz konfiguratzen duzunean aktibatu behar duzu; Nire iPhone-a bilatu du izena (hala egin ez baduzu, geroago ere aktiba dezakezu Doikuntzak aukera erabiliz).
• Datuetara ez sartzeko mota guztietako oztopoak jartzea da helburua. Horretarako, pasahitzak, patroiak, hatz-aztarna edo aurpegia ezagutzeko sistema erabiltzen ditu, baita hainbat segurtasun-neurriren arteko konbinazioa ere. Zure telefonoa ez da bortxaezina izango, baina edukiak blokeatzeko eta ezabatzeko denbora irabaziko duzu.
• Oso ohikoa da gailuaren kaxa botatzea. Hala egin behar baduzu, ez ahaztu terminalaren IMEI kodea apuntatzea, kaxaren albo batean egoten dena. *#06# terminalean bertan idatzita ere bila dezakezu.
• Azkenik, funtsezko zerbait: saia zaitez zure mugikorreko artxiboen eta, batez ere, kontaktuen segurtasun-kopia bat hodeian edo beste gailu elektroniko batean gordetzen. Google Drive eta Google Contacts zerbitzuek aukera hori eskaintzen dute, baina badira beste metodo batzuk ere. Atsekabe asko aurreztuko dituzu, zure telefonoa desagertzen bada.