Zozketa bat irabazi dut Internetez: zergak ordaindu behar ditut?

“Botniako golkoa”. Hitz horiekin, Valentinek, Manuelek, Erundinok eta Albertok, “Otsoek”, telebistan inoiz eman den saririk handiena irabazi zuten, 6,68 milioi euro... hori bai, zergak ordaindu aurretik. Ogasunetik igaro ondoren, kantitatea nabarmen murriztu zen.

Hasteko, Zerga Administrazioko Estatu Agentziak sariaren % 19 hartu zuen beretzat, hau da, 1,3 milioi, PFEZren kuotaren aurrerakin gisa. Erakunde ez-ofizial batek emandako sari bat izanik (Loterías y Apuestas del Estado, ONCE edo Gurutze Gorria, esaterako), zenbatekoaren zerga-ordainketa egin behar zen errenta-aitorpenean. Horrenbestez, “Otsoen” kasuan, kide bakoitzak sariaren bere zatia aitortu behar izan zuen ondare-sarrera gisa, eta sariaren % 46 eta % 50 artean ordaindu behar izan zuten, bizi ziren autonomia-erkidegoaren arabera. Horrela, bada, azkenean 720.000 eta 672.000 euro artean jaso zituzten, “gordinik” zegozkien 1,67 milioietatik oso urrun.

Adibide hori azken urteetako adibide ikusgarrienetako bat da, baina badakizu zein diren Ogasunari aitortu behar dizkiozun sariak? Esaterako, zerbait ordaindu behar duzu Interneten zozketa bat irabazten baduzu? Edo loteria tokatzen bazaizu? Eta zer egin behar duzu zure bankuak opari bat egiten badizu? Jarraian, sarien zerga-sistemari buruzko zalantza batzuk argitzen saiatuko gara.

Diru-sariak

Diru-sariak bi kategoriatan banatzen dira, zerga-ondorioetarako:

• Erakunde nazionalek, autonomikoek eta europarrek eta ONCEk eta Gurutze Gorriak antolatutako loteriek ematen dituztenak. Sari horietako bat tokatuz gero, % 20ko zerga bakar bat ordaindu beharko duzu saria kobratzeko unean, betiere 40.000 eurotik gorakoa bada. Kantitate horretara iristen ez bada, ez duzu ezertxo ere ordaindu beharrik izango.
• Gainerako diru-sariak. Kasu honetan, “Otsoen” kasuan bezala, hiru gauza izan behar dituzu kontuan: zenbatekoa, zein autonomia-erkidegotan edo foru-lurraldetan bizi zaren, eta gainerako diru-sarrerak. Zergatik? Hasteko, edozein diru-sariren % 19 ordaindu beharko duzu, eta gero, diru-sarrera gisa aitortu beharko duzu zure errenta-aitorpenean. Horrela, diru-sarrera gisa gehitu beharko duzu zure lan-etekinera, eta zenbateko osoari dagokion tasaren kalkulua egin beharko duzu.

Gauzazko sariak

• Internet bidezko lehiaketa batean 300 eurotik gorako balioa duen Gabonetako saski bat irabazten baduzu, adibidez, ziurtatu behar duzu lehiaketaren oinarriek PFEZren atxikipena jasotzen dutela (% 19koa). Horrela, zure PFEZren aitorpenean zenbateko honi aplikatuko zaio atxikipena: saski horrek duen balioaren eta % 19ko konturako sarreraren baturari, diru-sarrera hori zuk ordaindu behar izan baduzu salbu.
• Zozketa batean iPad bat edo azken belaunaldiko mugikor bat irabazi baduzu, adibidez, prozedura berbera da: sariaren gutxi gorabeherako zenbatekoa 300 eurotik gorakoa bada, zure errenta-aitorpenean gaineratu beharko duzu gailuaren balorazioa eta % 19ko konturako sarrera.
• Batzuetan, aurrezki-erakundeek opari bat egiten dizute beren produktuetako bat kontratatzean. Opari horiek kapital-etekin gisa hartzen dira eta zerga finkoak ordaindu behar dituzte, merkatuan duten balioaren arabera. Horrelako egoeretan, erakundeak berak eman behar dizu balio horren eta ordaindu beharreko zergaren berri. Oro har, opariak 6.000 eurotik beherako balioa badu, ordaindu beharreko zerga % 19koa izango da. Horrela, erakundeak berak egingo du atxikipenaren ziurtagiria, eta bertan, sariaren balioa eta konturako sarrera xehakatuko ditu, hau da, erakundeak opari horrengatik egin duen atxikipena.

Ikus dezakezun moduan, kantitate jakin batetik gorako sari eta opari guztietan ordaindu behar dira zergak; beraz, sari bat irabazi baduzu, ez ahaztu zure errenta-aitorpenean sartzea. Gainera, kasu zehatz bat azaldu nahi baduzu, LABORAL Kutxako zure gestorearekin jar zaitezke harremanetan. Hark behar duzun aholkularitza eskainiko dizu.