Opari jasangarriak Eguberri ekologikoago baterako

Black Friday, Cyber Monday eta Gabonetako kanpainan gaude, beraz, familiarentzako opariak prestatzen hasi behar dugu... eta seguru baten bat zuretzat ere badela. Horregatik, garrantzitsua da buruarekin jardutea, bulkadak alde batera uztea eta planetan gehiago pentsatzea. Izan ere, guztiok arduratu behar dugu ingurumenaz eta klima-aldaketaren aurkako borrokaz, baita eguneroko ekintza txikiekin ere. LABORAL Kutxan jasangarritasuna hainbat modutara sustatzen dugu eta festa hauetarako prestatzen ari zaren bidaietan turista arduratsua nola izan erakusten dizugu; beraz, gaur opari jasangarriei buruz hitz egingo dugu.

Opari bat oparitzeko edo jasotzeko ideia maite dugu. Harritzea edo ustekabean harrapatzea oso sentsazio pozgarria da. Gabonak, lagun izkutua, urtebetetzeak, San Balentin... gure maiteei objektu berezi bat oparitzeko data esanguratsuz beteta dago egutegia. Baina horrek ez du esan nahi hondakin (bereziki plastikoa) eta kutsadura kantitatea handitzea. Hona hemen zenbait aholku, oraingoan opari ekologikoen alde egin dezazun.

Eskuz egindako oparia

Noiztik ez duzu zuk egindako zerbait oparitzen? Eskuz sortutako detaile bat oso gauza pertsonala da, eta jasotzen duenak ez du inoiz ahaztuko. Ez da edozein dendatan eros daitekeen gauza arrunta, eta bientzat balio sentimentala duten objektu batzuk ere berrerabil ditzakezu, hala nola koaderno bat edo mezu, oroitzapen eta argazkiak dituen eguneroko bat.

Landare bat

Ez dago landare bat baino ekologikoagorik. Polita, apaingarria, biodegradagarria da eta giroa garbitzen du. Abantailaz beterik. Mota, tamaina eta prezio guztietakoak daude, beraz, ez kezkatu espazio edo diru arazoengatik. Hori ez da aitzakia. Pertsona pixka bat axolagabea bada ere, edo etxean denbora gutxi ematen badu ere, ardura handirik behar ez duen bat eros diezaiokezu: kaktus bat.

Liburu bat

Liburuak eta komikiak opari hutsezinak dira, gustuko gairen bat aukeratzen baduzu. Gainera, birziklatutako paperarekin eros ditzakezu, eta iraunkortasunaren alde kontzientziatzeko berariazko ikasgairen bat bila dezakezu.

Esperientziak

Opariek ez dute zertan objektu fisiko eta materialak izan behar, esperientziak edo zerbitzuak ere izan baitaitezke: bidaia bat, jatetxe bateko bazkaria, bainuetxe bateko bisita, sukaldaritza ikastaro bat, spa zirkuitu bat, bodega bateko bisita… Aukerak amaigabeak eta oso atsegingarriak dira!

Bio janaria

Jatetxe batera gonbidatu beharrean, janari ekologikoaren pack bat oparitu diezaiokezu. Gero eta denda eta marka gehiago sortzen dira (baita supermerkatuetan ere) elikagai organiko eta naturalekin. KM 0-ko produktuek kontserbatzaile eta pestizida gutxiago erabiltzen dituzte; beraz, osasuntsuagoak eta zaporetsuagoak dira.

Moda iraunkorra

Gure proposamen originalenek konbentzitu ez bazaituzte, arropa bila joan zaitezke... baina ekologikoa izan dadila. Gaur egun, birziklatutako materialak eta ehun osasuntsuak erabiltzean ingurumena errespetatzen duten marka asko daude. Jantzi horiek prezio altuagoa izan ohi duten arren, beren prozesuek karbono-aztarna txikiagoa sortzen dute, eta low cost modan hain ugariak diren erabili eta botatzeko kamiseta horiek baino iraunkorragoak dira.

Gure ideiak gustuko izatea eta horietakoren bat aukeratzea espero dugu. Bilgarri eta bilgarri ez-biodegradagarriz betetako edozein produktu erosi aurretik, pentsatu planetaren onerako alternatiba iraunkorrik badagoen. Iraunkortasunaren, hurbiltasunaren eta birziklatzearen aldeko ekimenen bat ezagutzen baduzu, kontaiguzu. Kontsumo jasangarriarekin eta hurbiltasunarekin bat egingo duzu gabonetan?